ЯхIлувну духIлай буссар чIумул щавурду

foto_8Лакрал райондалий гьарца шинал, администрациялул ОьрчIащалсса ва жагьилтуращалсса даврил ва туризмалул отделданул, Магьирлугърал управлениялул ва библиотекалул цачIуну сакин дурну, кIицI лагай Ватан дуручлачиминнал кьини. Гьашинугу байрандалул хьхьичI кьини Гъумук Хъун дяъвилия зана къавхьуминнал аьпалун дацIан дур­сса гьайкалданучIа хьунни Ватан дуручлачиминнал кьинилун ва Авгъаннава Совет аьрал буккан бувну 24 шин там шаврин хас дурсса митинг. Муний гьуртту хьунни райондалул идарарттал каялувчитал ва зузалт, учительтал ва дуклаки оьрчIру.
Митинграйн бавтIминнахь га кьини анавархъиндарай республикалул бакIчинал совещаниялийн лавгсса райондалул администрациялул бакIчинал буржру чIумуйну биттур буллалисса Абакар Къюннуевлул цIания байран барча дуруна ванал хъиривчу Юсуп Рамазановлул.
Ватан дуручлачиминнал байран жулва билаятрай 1918 шиная шихуннай дуллалишиву буслай, ванал кIицI лавгуна жулла ватан дуручлачиминнал наслу хIакьинугу лайкьну биттур буллай бушиву цалва аьскарнал бурж ва хьхьу-кьини хIадурну бушиву ватандалул кьини лахъан. Ванал ялагу кIицI лавгуна жулва аьралуннащал бацIансса аьрал дунияллий къабивкIшиву ва къабикIантIишиву тарихрал исват бувшиву.
Цаппара гьантрал хьхьичI Авгъаннава Совет аьрал буккан бувну 24 шин там хьушиву буслай, кIицI лавгуна Лакрал райондалия та дяъвилул цIаравух увкшиву 25 аскар ва та дяъвилул щавурду ми хIакьинусса кьинигу яхIлувну духIлай бушиву. Цалва ихтилат къуртал буллай, кIицI лавгуна ялун нанисса никиран жулла ватан дурурччуминнал ва личIи-личIисса интернационал дяъвирдай лажин кIялану бурж лавхъминнал чумартшиву ва виричушиву тачIав хъамакъаритантIишиврийн умуд­рай бушиву. ЧIа увкуна миннан тIайлабацIу.
Ванал хъирив ихтилатру бувна Лакрал ва Ккуллал районнал аьра­ли комиссар ХIасан Массуевлул, Лакрал ва Ккуллал районнал Авгъаннал ветерантурал советрал хъунама Аьбдулгъапур Оьмариевлул, Ккурккуллал школалул директор Даниял Магьдиевлул.
Ватан дуручлачиминнан хас дурсса назмурду дурккуна Гъумучиял школалул дуклаки оьрчIал: Оьмаров Расуллул, Макьаева Умаматлул, Абакарова Камилал.
Ахирданий рурцуна Дагъусттаннал гимн.