Рамазан АьбдуллатIипов къуллугърал аьрххилий лавгунни Чачаннал Республикалийн
Мартрал 13-нний ДР-лул Президентнал кIанайсса Рамазан АьбдуллатIипов къуллугърал аьрххилий лавгунни Чачаннал Республикалийн.
Республикалул бакIчинащал архIал бивзунни ДР-лул Президентнал ва ХIукуматрал Администрациялул Каялувчи Шагьаьппас Шагьов, цаппара министерстварттал ва ведомстварттал каялувчитал.
Административ дазуй Дагъусттаннал делегация хьунабавкьунни Чачаннал Республикалул парламентрал председатель Докуваха АьбдурахIмановлул, ЧР-лул культуралул министр Дикалу Музакаевлул ва цайминнал.
ЧIаххувсса республикалийн бияйхту Дагъусттаннал делегация бивунни Центерой шяравусса ЧР-лул 1-ма Президент, Аьрасатнал Виричу АхIмад-ХIажи Кьадировлул гьаттачIасса зияратрайн, тикку дурккунни дуаь.
Яла делегация лавгунни Гудермес шагьрулийн, ххал бунни дяъвилул иширттая махъ цIубуккан бувсса шагьру.
Грозный шагьрулий Чачаннал Республикалул бакIчинал резиденциялий Р. Кьадировлул хьунаавкьунни Р. АьбдуллатIипов. Тикку махъ лахълай, Рамазан АьбдуллатIиповлул увкунни:
«Зу дуллалисса гьарзат – АхIмад Кьадировлул цIа абад дансса давурттур, ганал хияллу щаллу бавур. На махIаттал хьуну ура шикку дурсса давурттая. Тай шиннардий на увкуссия, чIун дуссия чачаннал дагъусттанлувтурая за лахьлахьисса, утти тIурча чIун дуркIунни жун зуяту за лахьхьин аьркинсса».
Рамзан Кьадиров рязи хьунни регион тIутIайх бичиншиврул чялишну зун аьркинссар, закондалийн чулгу бивщуну, тIисса пикрилия:
— Агана жува законну дуручларча, Аллагьнал жунма кумаг бантIиссар, барачат ликкан бан. Жува аьркинссар цачIу зун жулва ялун бучIанмуниха. Жура дан аьркинмур жухлура щилчIав къадайссар, — увкунни Рамзан Кьадировлул.
Чачаннал Республикалул ва Дагъусттан Республикалул кьутIи чичин аьркинссар Чачаннал ва Дагъусттаннал агьалинал экономикалул ва культуралул масъалартту хIала-гьурттуну щаллу буллалаврил хIакъираву.
Муния бувсунни ДР-лул Президентнал кIанайманал хьунабакьаву къуртал хьуну махъ.
ДР-лул Президентнал кIанайсса Р. АьбдуллатIиповлул бувсунни ва хьунабакьаврил хъинну хъуннасса мяъна душиву, цIусса къуллугърай хъинну хъунмасса хайр хьунтIишиву Р. Кьадировлул опытрая Чачаннал Республика цIулаган давриву ва хьхьичIуннай хьун давриву.
Яла Дагъусттаннал делегация лавгунни ЧР-лул парламентрайн, ганил члентуращал хьунабакьин. Муния махъ кIивагу региондалул бакIчитал гьуртту хьунни СМИ-рдал Дунияллул халкьуннал конгрессрай, тикку жавабру дуллунни журналистътурал суаллахьхьун.
ХIадур бувссар
ХI. Аьдиловлул
