Дагъусттаннал шагьрурдаву МахIачкъалаллал хъирив кIилчин хъунмур шагьрулун ккаллийсса Хасавюртлив, 2010 шиналсса щалвагу Аьрасатнал переписьрал хIасиллайн бувну, 133 400 инсан яхъанай бусса бур. Ярусса бусса бур Хасавюртлив, масалдаран, мукьцIалазарунниха ливчусса, чачангу – микссава. Къумукьнал зувиазара инсан усса ур. ХIасил, лак хъинну чансса бур. Чансса бухьурчагу, буми лак ххуй-ххуйсса къуллугъирттайгу зий, миллатрал цIа гьаз дан хIарачат буллалисса бур. Цивппа зузисса кIанттурдай бюхъу-хIарачатрай зий, лак захIматгу ххирасса, зузаврил пагьму-гьунардугу бусса минахуртал, хьхьичIунсса каялувчитал бушиву ккаккан буллалисса бур. Мукун зузиминнавасса ур Чапаевкаллал шяравасса КьурбанмахIаммадлул арс МахIаммадов Исрапил, Хасавюртуллал шагьрулул администрациялул транспортрал управлениялул хъунаманал хъиривчу.

Исрапиллул ппу Бярнихатусса ур, нину – Чакъалиятусса. Чапаевкаллал школагу марцIну ххювардай къуртал бувну, Исрапил дуклан увххун ур Воронежрай­сса лесотехнический институтравун, автомобильный транспорт­рал инженер-механикнал касму лахьхьин. Му касмугу лархьхьуну, 1985 шиная шинай Хасавюртуллал личIи-личIисса структурардай зий ивкIун ур. Муния махъ ацIра шинай ПАТП-1 идаралий хъунама инженерну зий ивкIун ур, ацIра шинай тIурча мува идаралул директорнал хъиривчуну. ЦIанакулгу зий ур Хасавюрт шагьрулул транспортрал управлениялул хъунаманал хъиривчуну. Ванал кIия арс ур, ца душ. Кулпат фармацевт бур, ЦIуссалаккуй аптекалий зий бур.
Жун тIайлабацIу хьуна Исрапил КьурбанмахIаммадовичлущалгу хьунабакьин, мунал даврия цIухху-бусу бан. Хасавюртливсса Лакку мазрал байрандалий дукIува жун хъинну дакIний ливчIуна, 1999 шинал дяъвилул ппурттуву Хасавюртуллал транспортрал управлениялул даву ларайсса даражалий дуллай бивкIун тIий, кIа управлениялул коллективран лахъсса кьимат бивщуну бивкIшиву, Дагъусттаннал делегациялувух Исрапилгу Аьрасатнал Президент В. ПутиннучIан лавгун ивкIшиву. Му иширая буси тIисса бия жул цалчинмур суалгу.
— ЦIуссалаккуйн боевиктал ххявхсса ппурттуву Хасавюртуллал райондалул администрациялул тапшур бувна ЦIуссалаккуя къари-къужри, оьрчIру буккан бансса, ххилансса транспортрал дузалшинна дувара куну. Гьамиящату, Чапаевкалия агьали буккан бувссия жу. На нава лавгссияв халкь буцин Чапаевкалийн. Тиччасса инсанталгу бу­ккан бувну, ополченнал кьюкьлуву тиккува авцIуссияв кьюкьлул командирну. Агьали чувшиврий лахълай бия дурк кьини, гьарма хIарачатрай ия цала биялалиймур буван. 2000 шинал Дагъусттаннал делегациялувух нагу тIайла увккунав В. ПутиннучIан. Жул идаралун Барчаллагьрал чагъар буллуна. Дяъвилул иширттавух чялишну хIала бувхминнавух ттунгу дуллуна Президентнал цIа чирчусса мусил ссят, — тIий ур Исрапил.
ХIакьинусса кьинигу ва зузисса идаралул хIарачат бусса бур шагьрулул транспотрал даву сантирайн дутан, агьалинан къулайшиннарду дуллан. Муниципал образованиялул хъунама Сайгидпаша Умахановлул тапшур бувну бур дуклаки оьрчIру шагьрулул транспортрай уква ххилан. Спортрах хъуннасса къулагъас дусса шагьрулий, гьарцагу спортрал турнирданийн тIий, байрандалийн тIий, укра транспорт личIи дайсса дур, дуклаки оьрчIру аьркиннийн биян бангу, буцингу.
«Сайгидпаша Дарбишевич, миллатру личIи бакъа, ххуйну зузиминнал кьадру кIулсса хъунама ур, — тIий ур Исрапил КьурбанмахIаммадович. – Шагьрулул администрациялий, масалдаран, циняв миллатирттал вакилтал зий бур, мукунма Шагьрулул Мажлисрал депутатътурал корпусравугу. Лакрал чулухунмай личIиссава хIурмат бур учирчагу на къааьйкьинссара.
ЦIуссалакрал агьалинава чIявуми Хасавюртлив зий бур, сайки 30% бухьунссар учивияв, личIи-личIисса къуллугъирттай бикIу, базаллаву бикIу. Хасавюртлив базарду чIявур, мирихха водительтуралгу, парикмахертуралгу, цIигьуртуралгу зузи кIантту. Так даххулт бакъа зий бакъарив ми­кку. Чара бакъа кIицI лаган ччива укунсса кIанугу. Сентябрь зуруй Хасавюртуллал агьалинал шадлугърай кIицI лагайссар Шагьрулул кьини. 1999 шиналгу хIадур хъанай буссия лахъа-хъунну му байран дуван. Хасавюртуллал мэрну зузисса Сайгидпаша Умахановлул увкуна: «Жулва чIаххурайсса ЦIуссалакрал бакIрачIан кьини дуркний, байранну дуллалаву къаххуйссар». Му мудангу цалва чулухунмай хIурмат багьанну къуццу тIутIисса хъунама ур, «кабинетирттаву щякъабивкIун, агьалиначIан кьатIув буккира, агьалинащал архIал хъар дургьуну зузияра» тIун икIай му мудангу. Хасавюртлив бакъа бакъассар уссурвал Хачилаевхъал цIанийсса кIичIиравалу. Мугу лакрал хIурмат бушиврул барашинна дуллалисса лишанни».
Дуккавривугу, давривугу итххявхсса Исрапил Кьур­банмахIаммадовичлул оьрчIругу, цала ппу кунма, итххявхсса бур. Ванал душ Пятигорскаллал фармацевтиялул академиялуву марцIну ххювардай дуклай, лаваймур стипендия ласлай бур. Буттал цIа дирзсса арс КьурбанмахIаммадлулгу ларгсса шинал мусил медальданущал Хасавюртуллал школа къуртал бувну бур. Ва Хасавюртуллал школалул мусил медаль ларсъсса цалчинсса лаккучу-выпускник Саратоврал паччахIлугърал юридическая академиялуву дуклай ур. Тайский бокс­рахун агьсса, чIярусса соревнованиярттай ххув хьусса ва Саратоврал областьрал тIивтIусса чемпионатрайгу хьхьичIун увккун, чарвитул медальданун лайкь хьуну ур. Исрапил КьурбанмахIаммадович ххарину ур Хъун дяъвилул фронтовикнал, Чехословакиянаву, Югославиянаву виричуну талай ивкIсса, Будапешт ласайнийгу, Днепр нех тархъан дайнийгу гьуртту хьусса, орден-медальлал хъазам чIюлу бувсса разведчикнал, буттал цIа дирзсса арсгу дуккавривугу, спортравугу итххявхсса ушиврия. ЧIавама арс школалий дуклай ур.
Цумацагу чантI увкусса ла­ккучунал буруккинну бур Исрапил КьурбанмахIаммадовичлувугу.
— Лакку мазрай «цукун ура?» куну цIуххирча, «нормальнайну ура» тIий жаваб дуллай бур лакралми жагьилтал, миннан цалва мархри ва ппухълуннал маз кIулну бикIан аьркинни, миллатрал тарих, аьдатру, лавгзаманнул багьу-бизу кIулну бикIан аьркинни, жува миннан лахьхьин буллан буржлувссару, — тIий ур ва. Мукунсса мурадрайсса давурттив дуллалисса лак Хасавюртлив бушиврия ххарину, мудангу миннал дуллалимунивух хIала уххангу, шайкун чIарав ацIангу хIадурссара тIий ур. Гьаннайсса, чивугу лаккучунал бурж лажин кIялану биттур буллалиминнавасса ур.