Художникнал ляличIисса дуниял

foto_7Февральданул 18 –нний МахIачкъалаллал тарихрал музейраву хьунни дагъусттаннал 70 художниктурал сайки ттуршунниха лирчусса суратирттал «Автопортрет» тIисса выставка. Выставкалийн бувкIсса тамашачитурал хьхьичIун ларсун дия П.С.ХIамзатовал цIанийсса Изобразительный искусствалул музейрал фондравасса, художниктал зузисса мастерскойрдавасса живописьрал, графикалул, декоративно-прикладной искусствалул давурттив. Вайннува цаппарасса уттизаманнул цIушиннарду ишла дурну, видеопроектравух ккаккан дурунни.

Музейраву ккаккиялун дирхьусса автопортретирттаву дур XX ттуршукулул дайдихьулийсса художниктурал (Е.Лансере, Х.Мусаев, М.-А.Джемал) давурттая байбивхьуну хIакьинусса художниктурал давурттайн бияннин.
Выставка тIитIлатIисса шадлугърайн бувкIун бия республикалул интеллигенциялул бур кусса халкь, миннавух бия автопортретирттал автортал бакъасса, скульпторталгу, музыкантъталгу, фотохудожникталгу, магьирлугърал деятельталгу ва республикалул вузирдавусса магьирлугърал факультетирттал ва отделениярттал преподавательтал, студентътал.
МахIачкъалаллал тарихрал музейрал директор, выставкалул автор ва куратор Зарема Дадаевал шадлугъ тIитIлай кIицI лавгунни ва даврил хIадуршиннаран шанма барз лавгшиву ва цащава уттинин 150-сса произведенияртту цачIун бан бювхъушиву. Музейрал зал хъунмасса бакъахьувкун миннувасса цаппара тамашачитурал хьхьичIун дуккан къадуршиву. Ми ккаккан бюхъантIишиву видеопроекторданувух.
«Автопортретирттал экспозиция дагъусттаннал изобразительный искусствалул тарихраву жучIара цалчинни дуллалисса. Шикку дуссар дагъусттаннал 70 художникнал давурттив, миннава цаппараннал кIи-кIира, шан-шанна автопортретру дирхьуну дуссар. Жуща бювхъунни бакIрайва хIасул хьуну бивкIсса жула мурад дузрайн буккан бан, цанчирча, автопортрет-му дур ляличIисса, художникнан цана цува чулуха чIалачIи ан бю­хъайсса магьирлугърал ца жура. Зу хIисав ларсхьурча, вай давурттаву тикрал хъанахъисса кIанттурду бувагу бакъар, гьарнал дур цахра-цахрасса къулагъас, ябитаву ляличIисса, гьарнал дур цалла дакIниву куртIсса дуниял. Жула хьхьичI тIитIлай дур вайнналмур дуниял. Художникнал цанна цала сурат дишаву дур-ссигъа куннасса, мунал цахва, цала лагма-ялттумуних, оьрмулух, инсаннах ябитаврил хъирив бацIан буллалисса жанр. Автопортретрал цивунна жям дуллай дур философиялул чIярусса нукьсанну. Гьарцагу художникнал дур цалла дуниял, цалва тарих, цалла стиль. Романтиктурал учайссар художникнал цалла суратирттай пилчалух дирхьусса аьш-мури мунал автопортрет, куну, цанчирча гьарца цалла дихьлахьи­сса сурат миннал цалла дакIнил гьарцагу хIужрардавух итадаркьуну дишайну тIий. ХIакьинусса кьинилул тагьаргу миннал жула хьхьичIун ласайссар га тагьар цанна чIалачIисса куццуй, цалла бакIраву щаршсса куццуй»,-увкунни З.Дадаевал.
Выставкалий тамашачитураща бюхълай бур автопортретирттал чIарав лавхъсса гьарцагу художникнал автобиографиялущалгу кIул хьун, мунал творчествалул оьрмулуву хьусса агьамсса иширттая буккин. Выставкалул автортурал бусаврийн бувну, вагу уттинин жучIара къаишла дурсса цIушинна дусса дур. Цана кIулсса, мунал произведениярттая хавар бусса тамашачитураща бюхълай бур цува авторнал творчествалул ххуллухгу урган, мунал «лажингу» ккаккан, цIунила-цIунил мунал давурттан кьимат бищун.