Мартрал 17-нний цIуну тIивтIусса «Анжи-арена» стадиондалий «Анжи» ччалли дурккуна Самараллал «Крылья Советовращал». Най буна бусанну: билаятрал первенствалийгу тIайлабацIу къавхьуна жулла командалун.
«Анжи» (МахIачкъала) – «Крылья Советов» (Самара) 1:1.
Голлу: Корниленко, Траоре.
ЦIусса «Анжи-ареналул» трибунартту щапI куну бувцIуну бия тамашачитурал, тIуркIу байбишиннинма. Стадиондалий шадлугърал тагьар дия, га кьини тIивтIуна цуппа цIусса стадионгу. Циняв ххарину бия республикалий Европанал даражалийсса стадион баврия. Тамашачитал ххув шаврийн умудрай бия. Амма умудру барткъалавгуна ва ххуллухгу. ТIуркIулувух хIала-гьуртту къавхьуна хьхьичIмур тIуркIулуву кIира хъахъими карточкартту ккаккан дурсса Буссуфа ва заявкалувун къаагьну ливчIсса Дарра (яла лаваймур даражалул футболчитал).
ХIасан Аьдилов
Хиддинклул тамансса дахханашивуртту дуруна командалуву ва тIуркIулий. Полузащиталий кIану лявкъуна Шатовлун, гьужрай – Смоловлун, обороналул куямур чулий найуна ивтуна ТIагьирбеков.
Самараллал футболчитал хъунмурчIин буклай бия контратакарттайн хъарну. Дагъусттаннал футболчитурал хъунмур умуд бия Это Олуйн.
ТIуркIулул кIилчинмур бутIуй муттаэтурал голкипернал тамансса пагьму-гьунар ккаккан бувна цалва къапу ххассал бавриву.
63-мур минутIраву жулва футболчитурал гьужум бувсса чIумал, муттаэтурал контратака дуруна. Ангбвал ва Горол ттуп буллуна Корниленкохьхьун, ванал бавкьуна ттуп жулва къапулувун. Габуловлуща цичIав бан бюхълай бакъая га тагьардануву. Га чIумал Хиддинклул тIуркIулувун авкьуна Карсела ТIагьирбековлун кIанай. Муттаэтурал къапулувун гол бакьин бюхъанссия Жирковлуща, Смоловлуща, Это Олуща, гьарца вайннал бивщусса ттуп зана байва муттаэтурал къапучинал. Мяйжанссар Жоао Карлослул бивщусса, яла Траорел бавкьусса ттуп зана бан Веремкоща къавхьуна. Махъра-махъсса ацIра минутIраву жулла командалул хъунмасса хIарачат бувна ххув хьун, амма къабювхъуна.
Махъсса ппурттуву «Анжи» хьхьара хьуну дур. ДукIу ссуттил жулла команда яла хьхьичIунминнувасса цаннун ккаллину диркIссар Аьрасатнаву футболданул командарттаву. Утти жулла команда ЦСКА-лияр 7 очкорал махъний дур.
«Анжи»: Габулов, Жоао Карлос, Эвертон, ТIагьирбеков (Карсела-Гонсалес), Ещенко, Жусилей (Траоре), Шатов, Жирков, АхIмадов, Смолов, Это О.
«Крылья Советов»: Веремко, Таранов, Ангбва, Стив, Амисулашвили, Телес, Горо (Елисеев), Немов, Воробьев, Кабайеро (Верховцов), Лахиялов (Корниленко).
