Тикку ххалбигьлай бия СМИ-рдал агьамми масъалартту ва ялун нанисса чIумал дансса давурттал планну.

Совещание тIитIлай, Умар­хIусман ХIажиевлул бувсунни кказитирттал ва телевидениялул давуртту дикIан аьркиншиву Дагъусттаннал жяматрал оьрму ххуй баврийн тIайла дацIан дурну. МуницIун бавхIуну, СМИ-рдал хьхьичIсса хъунмур масъала хъанахъиссар ДР-лул Президентнал кIанайма Рамазан АьбдуллатIипов, республикалул цаймигу каялувчитал ссаха зий буссарив, ялун нанисса чIумал цукунсса масъалартту щаллу буллан ккаккан бувну буссарив инсантурахь бусласаву. Мунищала архIал, хъуннасса агьамшиву дур «махъуннаймур дахIаву» дузал даврилгу, яни кказитирттай чичлан аьркинну бур агьалинал пикри-зикрирдаятугу.
Совещаниялий ихтилат хьунни СМИ-рдал цIанасса тагьарданияту, миннул захIматми масъаларттаяту. У. ХIажиевлул бувсунни творчествалул коллективру цIубуккан буллан аьркиншиву, зузалтрал луртан дузал дан аьркиншиву. Хаснува ми масъалар­ттал агьамшиву дур миллатирттал мазурдийсса кказитирттан, радиорттан, цанчирча ниттил мазру кIулсса жагьилтал хъинну чансса бакъа бакъар.
Совещаниялий ихтилат хьунни журналистътурал даврил хIакьлил хIакъиравугу.
Бувсунни, мукунма, цIана республикалий хъанахъисса ишир­ттан кьимат бищайсса аьлимтурал ва аналитиктурал кIулшиврул даража лавайсса бакъашиву, СМИ-рдал дянив конкуренция дакъашиврул кказитру хьхьара хьун буллай бушиву.
Цамургу диялдакъашиврия хьунни ихтилат – СМИ-рдал электроннал версия дакъашиву. 49 муниципал СМИ-рдавату электроннал версия дур так 5-ннил. ЦIанасса заманнай Интернетраву къабуккайсса СМИ-рдал ялун бучIанмур бакъассар. Мунийн бувну ДР-лул Печатьрал ва информациялул министерствалул хIадур бантIиссар циняв муниципал кказитирттан ца журалул сайт. Мукунма циняв миллатирттал кказитирттан бантIиссар информациялул портал. У. ХIажиевлул мукъурттийн бувну, бюхъайссар ялун нанисса чIумуву 2 мазрайсса электроннал версия буклан.
Совещаниялий телевидениялул хьхьичI масъала бивхьунни властьрал вакилтуращалсса ток-шоу щаллу дуллан, властьрал даву аьчухсса дикIаншиврул.
Совещаниялий ихтилатру бунни мукунма ДР-лул Журналистътурал союзрал председатель Аьли Камаловлул, ДР-лул Печатьрал ва информациялул министрнал кIанайманал хъиривчу Миясат Муслимовал.