Органнаву тIайлашиву дикIан аьркинссар

hakЛаргсса нюжмардий Дагъусттаннал журналистурал къатраву хьунни Дагъусттаннал МВД-лул ва прокуратуралул тархъансса профсоюзрал вакилтурал пресс-конференция.

А. Аьбдуллаева
Шикку гьуртту хьунни ОВД-лул ва прокуратуралул зузалтрал тархъансса профсоюзрал председатель, капитан МахIаммад Шамилов, МВД-лул УВО-лул (Управление вневедомственной охраны) хъунаманал хъиривчу, полковник СалихI ХIажиев, УБЭП-рал хъунама оперуполномоченный, подполковник Сулайман Аьбдуллаев, ППСП№1-лул командирнал хъиривчу, подполковник МахIаммад ХIусайнов.
Конференция тIитIлай, кутIасса ихтилат бунни Дагъусттаннал Журналистурал союзрал председатель Аьли Камаловлул. Ванал бувсунни уттигъанну профсоюзрал делегатътал Москавлив бивкIшиву.
Тийх инсаннал ихтиярду дуручлачисса Президентнал Советрал хъунама М. Федотовлул хIарачатрайну вай журналистуращал хьунабавкьушиву ва ми­кку ихтиярду дуруччай органнал хIакъиравусса ихтилат хьушиву.
— Уттигъанну на хьунаавкьура СКФО-лул Силистталул комитет­рал вакилнащал. Ттухь бувсунни журналистал оьрмулуцIа баврил хIакъиравусса информация МВД-лул зузалтрал бахлай бушиву. Мукун бавххуну бур «Дагестан» ГТРК-лул директор ХIажи Абашилов ва журналист Аьбдулмалик АхIмадилов ивчIаврил хIакъиравусса информациягу.
Тахсиркаршивуртту ва тахсиркартал ашкара бан аьркинми, ми кIучI бан кабакьлай бур, — увкунни Аьли Камаловлул. Хъирив ОВД-лул ва прокуратуралул зузалтрал тархъансса профсоюзрал председатель М. Шамиловлул кутIану бувсунни журналистуращал хьунабакьин бувкIминная ва цала МВД-лул каялувчитурал чулухуннайсса рязибакъашивурттая.
— ХIакьину зущал хьунабакьин бувкIсса инсантал бур, чIярусса шиннардий органнаву зий, цалла пишакаршиву ва марцIшиву ккаккан дурсса зузалт. Милицанал подполковник М. ХIусайнов махъсса 10 шинал лажиндарай талай уссар ППС-вусса коррупциялущал ва цаймигу закондалул ххуттава бувксса иширттащал. Ва къарши ацIлай, дащуй бихьлай ивкIссар арцух даврийн кьамул буллалисса ишру. ХIакьинусса кьини органнаву ва кунмасса опыт бусса, цалва службалул хIал кIулсса, компетентнайсса инсантал чансса бур. Бувагу 15-20% зузалтрал бухьунссар мукунсса. Мунияту МВД-луву кадрардал кризис дур, мунияту чIяруми уголовный делорду ашкара къадурна личIлай дур.
УБЭП-рал хъунама оперуполномоченный С. Аьбдуллаев цила икIайкунсса зузала ур. Ванал цалалу дурмургу, щаллусса отделениялул дурмургу архIалсса дикIай. Махъва-махъ ванал ашкара дурсса аваза бувтсса тахсиркаршиву хьуссар 1,5 млрд. къуруширттансса 200 вагон спиртрал бавцусса иш. Му ашкара баву багьана хьуну, угьара хьуну ур тIий, ва цувагу даврия мурахас увссар. ЧIалачIисса куццуй коррупциялущал талатими виваллил иширттал органнаву аьркинну бакъар.
Вай масъалартту гьаз бан ччай буру жу Аьрасатнал виваллил иширттал министр Владимир Колокольцевлущалсса хьунабакьаврий, — бувсунни М. Шамиловлул.
Ванал, мукунма, бувсунни, Москавлия бувкIун махъвагу, ДР-лул МВД-лул каялувчитурал цивппа кьамул къабувшиву.
Жул чагъар М. Федотовлул тIайла бувккун бия АьФ-лул Виваллил иширттал министр Владимир КолокольцевлучIан, танал жу кьамул баву мурадрай. Цукун бивссарив чагъар цал Дагъусттаннал Президентнал канцеляриялувун, мичча ДР-лул Мюхчаншиврул Советрал Секретарь М. БаачиловлучIан бивну бур. Муналгу, жуйн оьвкуну, жух вичIи къадирхьуну, жул оьмурдан нигьачIаву душиву хIисавравун къалавсун, тIайла бувккун бур жул чагъар ДР-лул Виваллил иширттал министрначIан, — бувсунни М. Шамиловлул.
Хъирив ихтилат бунни УВО-рал хъунаманал хъиривчу СалихI ХIажиевлул.
— Аьрасатнал Виваллил иширттал министр В. Колокольцевлул зузалтрахсса жаваб каялувчиная тIалав дуллалаву тIайласса чаранни. Цинявннан бавхьунссар уттигъанну кафелуву увччу хьусса милицанал 2-3 инсан бивтун бивчусса. Мукунсса ишру къахъанантIиссар зузалтрал дуллалимунихсса жаваб каялувчинаягу тIалав дулларча, — увкунни ванал. Ахирданий Аьли Камаловлул барчаллагь увкунни вайннахь сивсуну, нигьа къабувсун, ихтиярду дуруччай органнавусса тIайладакъашивуртту гьаз дуллай тIий.