Новолакская районная больница №1 (Новострой) сдана в эксплуатацию в 2009году.На днях больницу посетили представители Минздрава России. Гости изМосквы обещали учесть расположение больницы рядом с федеральнойтрассой и в связи с этим помочьсовременнымоснащением отделений хирургии и реанимации.
Вай гьантрай, Дагъусттаннайсса медициналул иш-тагьар ххал дуван, МахIачкъалалийн бувкIунни Аьрасатнал здравоохранениялул министр бакIчийсса делегация. Му делегациялул программалуву бия ЦIуссалакрал райондалул №1-мур азарханалийн (Новостройрайсса) аьлтту буккавугу. Хъамал хьунабакьин бувкIун бия ЦIуссалакрал райондалул администрациялул бакIчи ХIажи Айдиев, мунал хъиривчу Аьли Исрапилов, Халкьуннал Мажлисрал депутат Зайнуллагь Мирзоев, азарханалул хъунама хIакин Булбул Исрапилова.
П. Рамазанова
А. Аьбдуллаева
Москавлиясса хъамаличунащал, здравоохранениялул департаментрал директорнал хъиривчу Андреев Алексей Сергеевичлущал азарханалийн бувкун бия Дагъусттаннал здравоохранениялул министрнал кумагчи Заира Исрапилова (ттигъанну ва цIусса къуллугърай цIакь бувсса) ва министрнал хъиривчу Салман АхIмадов. Новостройрайсса азархана цIусса азархана бур, бувар му багьайкун аьркинсса оборудованиялул щаллу бан, бувар азарханалий къабувну чара бакъасса отделенияртту буван. Хъунама хIакин Булбул Исрапиловал бувсунни хъамаллурахь азарханалун хIакьину цукунсса оборудование, ка-кумаг аьркинну буссарив, ккаккан дунни хъамаллуран мукьрагу отделение (хирургиялул, неврологиялул, терапевтиялул ва оьрчIансса).
Хъамал тIайла бувккун мукьах райондалул администрациялул бакIчи ХI. Айдиев, Халкьуннал Мажлисрал депутат З. Мирзоев хьунабавкьунни азарханалул коллективращал. Райондалул хъунаманал бувсунни хъамал, цIусса миналийсса азархана хIисаврай, Новостройрайн бияву, му цIусса миналийн бизлазиминнах аякьа душиврул барашин дуллалисса даву душиву.
«Москавлив чиновниктуращал маз лякъин бигьану бикIай, агар миннан жулва масъаларттая хавар бухьурча. Хъамаллуран ккавккунни ци тагьар дуссарив, миннан бувчIунни азарханалун кумаг аьркинну бушиву. Ва хьунабакьаврийну гьашиву къадурну, жу дакIний буру Москавливнма лавгун жаваблувсса къуллугъирттай зузиминнайн буккан. Азархана бусса кIану ххуй бивзун, Алексей Сергеевич маслихIат буллай ия шикку, Новостройрай, Реабилитациялул центр тIитIин. Мугу ххуйсса пикри бур.
Гьашину 30 кIану бусса родильное отделение бан пландалувун бувтун буссар. Цайми отделениярттал корпусругу буван багьлай бур. Федерал трассалул чIарав бухьувкун азархана, авариярттаву, бала-апатIру, цIунцIияртту хьусса инсантал бувцуну бучIай шиккун. Гассят кумаг бансса даражалийсса, цимурцаннул щаллусса реанимациялул ва хирургиялул отделенияртту дикIан аьркинни. Ми цимурца дузал давриха зунтIиссару», — увкунни ХIажи Шихамировичлул. Булбул ХIасановнал бувсунни, цIусса миналийн бизлазисса агьалинал аьдад ялу-ялун хъун хъанай духьувкун, азарханалий зунсса цIусса специалисталгу тIалав бан багьлай бушиву, роддом баву бакъассагу, инфекциялул отделение, баклаборатория, УЗИ-аппаратру аьркинну бушиву, хIакьинусса кьини азарханалул коллектив цалла даву лажин кIялану дуллай, бюхъу-хIарачатрай зий бушиву.
Азарханалул даврия ва коллективрая бусласисса репортаж дикIантIиссар хъиривмур номерданий.
