Лакрал кюру буручлай

hasЧIярусса шиннардий Хасаврай ялапар хъанахъисса лаккучу АхIмад МахIаммадович Кьурбанов къакIулсса тийх нажагьсса бухьунссар. Ва чялишну гьуртту шайссар гьарицагу шагьрулий хъанахъисса ишир­ттавух. Хасаврайсса лакраннив ва ишин-итан кIану бакъар. АхIмад МахIаммадович ур цалва миллатгу, мазгу, культурагу ххирасса, лакрал бучIантIимуний дакI цIуцIисса хIакьсса патриот. Ва ур Хасаврай мина дирхьусса лак цачIун буллалисса, тийхсса лакрал кюру сакин бувну, му буручлачисса лаккучу.

ХIакьинусса кьини Хасаврай ялапар хъанахъисса чIявусса лакрал кулпатирттавун «Илчи» кказит биллалавугу, Лакрал театр чIун-чIумуй Хасаврайн букIлакIавугу ванал хIарачатрал ишри. ЧIявуми кулпатирттансса кказитругу ванал цалва чичлай ур, театрданувунсса билетругу чIявучин цалва лавсун бачIлай ур. АхIмад МахIаммадовичлул бу­ттахъал мархри нанисса КIихIарчIи шяравалу духларгсса лакрал щархъавасса ца дур. Увну ур АхIмад ЦIуссалакрал шяраву. Хъунмур оьрму бувтун бур Хасаврай. Амма миллатрахсса ччаву ванаву цинявннайх дачIинуксса дур. Лакку мазрайсса ихтилатгу щияргу марцIну ва пасихIну бувай.
АхIмад Кьурбанович хъунмасса хIаллай цалва кабинетраву ца администрациялул зузалащал лакку мазрай гъалгъа тIий ия. КьатIув бувккун махъ, кIа лаккучу къаивкIшиву кIул хьуну, махIаттал хьуну ливчIру. ДакIнийн багьунни ванихава лавхьхьусса ца цамургу иш. Цаппара шиннардил хьхьичI Кисловрайн лавгсса чIумал, укунасса лакрал патриот Аьлил АхIмадовлул цала шупIирнан, татар миллатрал оьрчIан, бия лакку маз лахьхьин бувну. Цувагу мунащал лакку мазрай гъалгъа тIун икIайва. ДакI ххари шай лакраву укунсса яхI бусса чиваркI хьунабавкьукун. Бухьурчагу жувува «ЦIахъардал къуманива бувккун махъ лакку маз ссан аьркинссар» тIисса, щукру бу­сса АхIмад ва Аьлил кунмассагу.
Уттигъанну лакращал кIул хьунсса, лакрая чичинсса мурад­рай Хасаврайн аьрххи багьувкун, гьай-гьай, хьхьичIва-хьхьичI жу хьунабавкьуру шагьрулувусса лак щиннияргу ххуйну кIулсса АхIмад МахIаммадовичлущал.
— АхIмад МахIаммадович, цал кутIану виятува буси.
— Увссара 1963 шинал ЦIу­ссалакрал райондалий ЦIуссалакрал шяраву. 1981-1984 шиннардий къуллугъ буллай уссияв аьралуннал хьхьирил флотрай. 1998 шиная айивхьуну Хасавюртуллал администрациялул хъунаманал кумагчину уссияв. 2003 шинал увчIунна шагьрулул Мажлисрал депутатну, 2009 шиная айивхьуну муданасса гьанулийсса депутатну. На хъанай ура Хасавюртуллал чулухасса «Единая Россия» партиялул политсоветрал член. Бур кулпат, мукьва оьрчI.
— Депутат хIисаврай, цуку-цукунсса масъаларттаха зун багьай вин? Ци захIматшивуртту хьунадакьай ми щаллу бавриву?
— Ттул биялалийн дагьлагьиссар административ органну, лавайсса ва дянивсса даражалул кIулшивуртту дулайсса дуккаврил заведенияртту, цIуллу-сагъшиву дуруччаврил идарартту ва социал блок.
Агьалинаясса аьрзри ххал бувну, ми щаллу бансса чаранну ляхълан бикIару. БикIай щаллу бан шайссагу, къашайссагу масъалар­тту. Масала, аьрзри бикIай аьрщи дулара тIисса. Дакъасса аьрщи чари дулунтIисса. Микку цичIав чаран лякъин къашай. ЧIявусса аьрзри бикIай инсаннал социал дузалшиннарацIун бавхIусса. Ми аьрзри ххал бувну, шайсса кумаг бувару.
— ХьхьичIва Хасавюртуллал консерварду дай заводрал цIа машгьурну дикIайссия. ХIакьину ци тагьарданий бур му?
— ХIакьинусса кьинигу завод зий буссар, тIалавну дуссар мунил продукция, цIа дурксса «Хас-сокрая» тIайла хьуну. Консервардал завод бакъассагу, жучIа зий буссар калпушру бай заводгу, мадарасса мюрщи предприятиярттугу. Миннулгу мадара халкь даврил дузал буллай бур.
— Циксса лак бур хIакьину Хасаврай? Бурив инава кунма къуллугъирттай­ссагу?
— ХIакьинусса кьини Хасаврай 6 азарунния ливчусса лак ялапар хъанай буссар. Шаннагу лакрал районнал шяраваллал агьлу бур шикку. Бур ЦIуссалак, ЦIувкIул, Хъусращи, Куми, Ккурккул ва цаймигу щархъал агьлу.
Гьарица шяраваллил жямат­рал цала-цала хъунама уссар. Ми чIун-чIумуй батIайссар маслихIат ккаккан. Цинявппагу лакрал Совет старейшиндалул хъунама ур ТтурчIиясса Захаров МахIаммад Аминович.
Цайми миллатрал агьлу ххишаласса кIанай, учиннуча, чил аьрщарай лак давуртталгу дузалну буссар, къуллугъирттайгу буссар, цивппа бавцIусса кIанттурдай махъ най, бусравнугу буссар. ХIакьинусса кьини Хасавюртуллал школардай 24 учитель лакрал миллатраясса уссар. ЦIана лакку мазрал дарс дихьлан­сса учительнах луглай буру. Му ца хIукуматрал харжлицIух къаитанну, жувагу ка-кумаг булланну тIий баян буллай буру. Ва масъалагу ччяни щаллу бан хIарачат банну. Шийхсса ВУЗ-дал филиалдавугу лак зий бу­ссар. Чансса бакъар больницардай, поликлиникардай зузиссагу. Бур жаваблувсса хъунисса къуллугъру бувгьуссагу: Шагьрулул администрациялул хъунаманал хъиривчу МахIаммад Мяндиев, Хасавюртуллал райондалул УФСБ-лул хъунама МаматIи ХIамзатов, Силистталул комитетрал хъунама ТIагьир Сутаев, Федерал судья Малик Аьлиев, ЦПЭ-лул районнал отделданул хъунама Садруттин Рашидов, рес­публикалул халкьуннал мажлисрал депутат, Хасавюртуллал райондалул кулпат хIасул баврил центрданул (центр планирования семьи) хъунама хIакин Зайнуллагь Мирзоев, Лакрал вакилтал буссар шагьрулул мажлисравугу, прокуратуралий ва судрайгу – гьамин, хъуннасса агьамшиву дусса кIанттурдай.
Бур буттал буттахъая шихуннай нанисса лакрал сянат дургьуссагу. Масала, уссал усттартал, ккарччал усттартал.
Чансса бакъар бизнесрахун, предпринимательствалухун багьсса. Ттула уссийлгу буссар «Адам» тIисса стройматериаллал оптовая база. «Стройарсеналданул» хъунамагу лаккучури – ДучIиясса Нуруллагь МахIаммадов. ХIасил, шагьрулул хъунама яручу ухьурчагу, гайми циняр агьалинаха къуллугъ буллалисса идарартту лакрай дарцIуну дур.
— Мигу инава кунма лак тIисса, миллатрай ччаву дусса, жулва мазгу, культурагу дуруччин хIарачат буллалисса бухьуви.
— Гьарица лаккучунал лакку мазрай дакI цIун аьркинссар, му дакI цIуцIаву дакъахьурча, жулва маз бухлагантIиссар. ЧIявусса миллатру бусса шагьрулий жулвамур маз буруччин хIарачат буллай буру жу.
Дагъусттаннал Ухссавнил чулухмур культуралул центр хъанай бур Хасавюрт. Жул пикри бур, жулва мазгу, культурагу ядан, жулла аьдатругу хъамакъадитан, шикку Лакрал культуралул центр сакин бансса. Жула мукунсса центр бакъахьурча, цаппара шиннардива лакку мазрай гъалгъа тIисса инсан къалякъинтIиссар.
ХIайп, цинявппа му зат бувчIлачIисса бакъар. Жу оьвтIун бикIару шихун Лакрал театрданийн. КIу къабизан, нава лавсун булара билетру.
Уквасса билетрах къалавгун бикIай. Гьашину 100 «Илчи» кказит чичарду 3-4 инсан цачIун хьуну. ДукIугу, гьашинугу лахъа-хъунну кIицI дарду Ниттил мазрал кьини. Уттиния тихунмайгу, шаннагу лакрал райондалул вакилтурайнгу оьвкуну, чIявусса хъамалгу бучIан бувну, ваниярдагу бюхттулну данну му байран. Иншааллагь.
— АхIмад МахIаммадович, Чачаннал дазуйсса шагьру бушивруцIун бавхIуну хьунадакьлакьисса захIмат­шивурттугу дурив?
— Дакъар. Хасавюрт цуппагу чIявусса миллатру яхьусса, интернационал шагьру бунугу, миллатир­ттал дянив къалмакъал, питна хьусса кIанттурду жучIа къашай. Шагьрулул хъунамагу циняв миллатирттах цакуцну уруглагисса, миллатирттал дянив ссивцIу къабагьансса куццуй зузисса инсан ур.
— Барчаллагь, АхIмад Кьурбанович. Ина кунмасса чиваркI чIяву баннав жулва миллатраву.