Ларгсса нюжмардий Гъумук спортзалдануву хьунни гьарца шинал райондалий байсса дуклаки оьрчIал ва хъуниминнал дянивсса настольный теннисрал бяст-ччал. Му хас бувну бия Ватан дуручлачиминнал кьинилун ва Совет аьрал Авгъаннава буккан бувну 24 шин шаврин. Бяст-ччал бия цивппа-цивппалу ва чут-чутну.
Бяст-ччал тIитIлай, Лакрал райондалул спорткомитетрал хьхьичIунсса пишакар Малик ХIусмановлул гьуртту хъанахъими барча бувна Ватан дуручлачиминнал кьинилущал, тIайлабацIу чIа увкуна ца райондалул вивсса дакъассагу, щаллагу республикалул ва мунил кьатIувсса бяст-ччаллаву ххув хьунсса. Бяст-ччалливу гьуртту хьунни Гъумучиял школалул ва лицейрал, КIундиннал, ЧIарттал, Хъунайннал, ГьунчIукьатIрал, Кумиял, ШавкIуллал ва ЧIурттащиял школарттал командартту – циняв­ппагу теннис ххирасса 50 инсан.
Бяст-ччаллил хIасиллайн бувну, дуклаки оьрчIал дянив цивппалусса бяст-ччалливу цалчинмур кIану бувгьунни Хъунайннал школалул дуклаки оьрчI ЦIаххаев ХIалимлул; кIилчинмур кIану бувгьунни КIундиннал школалул дуклаки оьрчI МухIадов МахIаммадлул; шамилчинмур кIану бувгьунни Хъунайннал школалул дуклаки оьрчI МахIаммадов Рамислул. Тамашачитурал цIа рирщусса бахшиш дуллунни ЧIурттащиял школалул дуклаки оьрчI Кьурбанов Маратлун.
Хъуниминнал дянив цивппалусса бяст-ччалливу цалчинмур кIану бувгьунни Хъунатусса Аьшаев Абусупияннул; кIилчинмур кIану бувгьунни Гъумучатусса Ханов МахIаммад-Расуллул; шамилчинмур кIану бувгьунни Гъумучатусса АлхIасанаев Бухаринал.
Хъуниминнал дянив чут-чутсса бяст-ччалливу цалчинмур кIану бувгьунни АлхIасанаев Бухаринал ва ЦIаххаев Бунияминнул; кIилчинмур кIану — Ханов Шарапуттиннул ва ХIусманов Маликлул; шамилчинмур кIану — Айгунов Жамалуттиннул ва Закарияев Салимлул. Шаннагу команда Гъумучатусса дур.
Бяст-ччалливу хьхьичIунсса кIантту бувгьуминнан дуллунни райондалул администрациялул чулухасса грамотарду, медаллу ва арцуйнусса бахшишру.