Ганащал архIал бивзунни Да­гъусттаннал парламентрал спикер Хизри Шихсаидов, республикалул ХIукуматрал Председательнал хъиривчу Абусупиян Хархаров ва цаймигу.
Делегация бивунни Къарабудахккантуллал райондалул Уллубийаул тIисса шяравун. Тичча лавгунни Избербашлив, тикку ххал бунни цIуну буллалисса социал объектру. Яла лавгунни Къаякантуллал райондалийсса Новокъаякантуллал шяравун. Тикку ххал бунни тарихрал ва улклул аьламатирттал музей. Экскурсиярдал пишакарнал бувсмунийн бувну, Кьиблалул Дагъусттаннай дур 6-7 азарда шиннардий яхьусса тарихрал гьайкаллу. Музейраву дур та заманнай багьлул ххирану диркIсса къаяккантуллал хъаттирду.
МуницIун бавхIуну Рамазан АьбдуллатIиповлул бувсунни аьдатру, традицияртту ядан аьркиншиву. Ганал мукъурттийн бувну мунил бусласиссар Дагъусттаннай нукIузаманнул цивилизация яхьуну душиву. Вайва къатраву тIитIин аьркинни хъаттирду щащайсса усттартурал къатта, му бизнес дачин даншиврул итадакьлан аьркинни арцурду.
Р. АьбдуллатIиповлул музейран пишкаш бунни цалва чивчусса «Мой дагестанский народ» тIисса лу.
«Ангарда жува ттинияр тихунмайгу Дагъусттан районнайх ва миллатирттайх бачIларча, жучIава тачIав барачат къаликкантIиссар. Амма жунна кIулну дикIан аьркинссар жулла культура, жулва маз ва аьдатру», — увкунни ганал.
Р. АьбдуллатIиповлул ххал бунни Культуралул къатта, яла тапшур бунни оьрчIал театрдал художественный коллективир­ттал фестиваль дуван. Республикалул бакIчинал ххалбивгьунни шяраваллил хоязйствалул давурттал хIакъиравусса масъаларттугу. Къаяккантуллал райондалул бакIчинал мукъурттийн бувну, райондалий иширайну давуртту дакъасса инсантал бакъари.
Тичча Р. АьбдуллатIипов бакIчисса делегация лавгунни Дагестанские Огни шагьрулийсса «Дагстекло» заводрал дуккан дуллалимур ххал дан. ЦIанасса ппурттуву та заводрал дуккан дуллай бур 160 тонна пюрундалул кIива пачлий.
Делегация лавгунни га шагьрулийсса цаймигу объектирдайн.
ХIадур дурссар
ХI. Аьдиловлул