Ватан дуруччайминнал кьинилун хасну, МахIачкъалаллал администрациялул Шагьрулул жагьилтурал центрданул ва Спортрал, туризмрал ва жагьилтурал иширтталсса байсса комитетрал сакин дунни спортрал жагьилтурал проект «А ну-ка, парни!» цIанилусса. Мунивух гьуртту хьунни республикалул вузирдал яла итххявхми, хьхьичIун ливчуми жагьилтал.
Бадрижамал Аьлиева
Ва бяст-ччал сакин хьуну бия личIи-личIисса этапирттая: спортралми бяст-ччаллацIун дархIусса 4-гу этапрая ва конкурсрал махъра- махъмур, 5-мур – интеллектралмур этапрая. Интеллектралмур сакин хьуну дия шанма бутIуя. Цалчинмуниву жагьилтуран аьркинну бия Ватан дуруччайминнал байрандалул тарихрацIун бавхIусса суаллан жавабру дулун. КIилчинмуниву ва бяст-ччалданивух гьуртту хъанахъиминнан куннал куннахьхьун булун, хIадур бан аьркинну бия «Символика Российской армии» темалийн багьайсса суаллу. Шамилчинмур бутIувугу хьунни капитантуралмур конкурс.
Ванияр хьхьичIми турдал хIасиллайн бувну хьхьичIун ливчуссия ДГУ, ДГПУ, ДГТУ, ДГМА, ДГИНХ, ДГАУ, МГОУ. Ва турданувурив цалчинсса кIану бувгьунни ДГМА-рал командалул, кIилчинсса – ДГИНХ-рал, шамилчинсса ва мукьилчинсса – ДГТУ-рал ва ДГПУ-рал командарттал.
«А ну-ка, парни!» конкурсрал ххюрагу турданул аьм­сса хIасиллайн бувну, ххув хьунни ДГИНХ-лул команда. КIилчинсса кIану бувгьунни ДГТУ-рал жагьилтурал, шамилчинмургу – ДГПУ-рал командалул.
Ххув хьуминнан бахшишру дуллай ия МахIачкъалаллал администрациялул Спортрал, туризмалул ва жагьилтурал иширтталсса байсса комитетрал председатель Ислам Аьлиев. Ва конкурсраву хьхьичIун ливчуми лайкь хьунни дипломирттан ва багьлул ларайсса бахшишир­ттан.
Ва бяст-ччал, щак бакъа, хьунни хIазсса, оьрчIан мюнпат­рансса.