Гьарцагу райондалий бикIантIиссар МФЦ

filas_15МахIачкъалалив мартрал 4-нний Миллатирттал библиотекалул конференц-залдануву хьунни Дагъусттан Республикалий хIукуматрал ва муниципал хIаллихшиннардил даража лахъ бавриха зузисса Комиссиялул батIаву.

 З. АьбдурахIманова 
БатIаву дачин дурну ия ДР-лул ХIукуматрал председательнал хъиривчу Абусупиян Хархаров. Мукунна шикку гьурттушинна дурунни ДР-лул экономикалул министрнал и.о. Раюдин Юсуповлул, ДР-лул телекоммуникациярттал ва связьрал министрнал и.о. Сефер Аьлиевлул, республикалул шагьрурдал ва районнал каялувчитурал.Комиссиялул даву дайдихьлай, Абусупиян Хархаровлул кIицI лавгунни, хIукуматрал ва муниципал хIаллихшиннардил даража лахъ баврил биялдаралу душиву халкьуннал хIукуматрал къуллугъирттайнсса вихшала.«ЧIяву функцияртту бусса центрду (МФЦ) хъанахъи­ссар халкьуннал ва хIукуматрал къуллугъирттал дяниву вихшаласса дахIаву дансса агьаммур ххуллу-хха. Цумур-цагу цалва масъала щаллу бан увкIсса инсаннал хаснува му чIумалли жулва даврин кьимат бищайсса. Вава мурад щаллу хьуну ччай бур ДР-лул Президентнал врио Рамазан АьбдуллатIиповлунгу. ХIакьинусса кьини республикалий зий бур мяйва МФЦ. Аммарив 2015 шинайннин жучIава гьарцагу шагьрулий ва райондалий зун аьркинссар укунсса центрду. Муниципалитетир­ттал каялувчитуран, вай центрду бансса арцух къаялугьлай, цIанава сукку хъанан аьркин­ссар. Масалдаран, бучIиссар цачIара дусса къатри хIадур дуллан, мивун аьркинсса кьай тIалав дуллан, дакьин дуллан. МФЦ-рду тIитIлатIиссар чагъардал буза-базарду чан баншиврул, халкь личIи-личIисса справкардал хъирив тичча шиккун, шичча тиккун лечлачи къабулланшиврул, гьарзатрал щаллушинна ца кIанай дулланшиврул, къатрал, аьрщарал касакрал документру чункIуй къалавгун щаллу булланшиврул. 

Жулва хьхьичI бивхьусса агьаммур суалли – халкьуннан дагьайсса хIаллихшиннарду «ца чIавахьулттичIан» гъан хьуну щаллу бансса шартIру дузал даву. КъакIулну-кIулну, багьай­сса чагъарду бакъа увкIсса инсан идарарттайх лечлачи къаувну, ми центрдайва щаллу баврихару жува зун аьркинсса», — увкунни ДР-лул ХIукуматрал председательнал хъиривчунал.
Ва масъала ссайн бивну бу­ссарив ва вания гихуннай дан аьркинсса давурттаясса гьарта-гьарзасса ихтилат бувунни ДР-лул экономикалул министрнал и.о. Раюдин Юсуповлул. Шикку ванал чIурчIав дурунни административ барурду бухлаган баншиврул вай центрду тIитIин аьркиншиврий.
«Уттинин республикалий тIивтIусса мяйва центр зий бур МахIачкъалалив, Каспийскалий, Къизилюртлив ва республикалул ххюра райондалий. Муниципал сакиншиннардил цанма ччай тIивтIуссар вай центрду. Центрду бан харж хьуссар 85 млн.арцул», — увкунни ванал.
Мукунма ванал кIицI лавгунни чIал къавхьуну ттигу мяйва МФЦ тIитIинтIишиву: Буйнакскалий, Дагестанские Огни шагьрулий ва цаппара цаймигу районнай. Масалдаран, ЦIуссалакрал райондалий укунсса центр тIитIин хIадурну бусса бур.
Яла ххуйну зий бусса бур Каспийскаллал МФЦ, цивугу уттинин 240 азарва аьрза ххалбивгьуну бур. МахIачкъалалив тIурча мура чIумул мутталий ххалбивгьуну бур 40 азарва аьрза. Шикку Абусупиян Хархаровлул кунни, Каспийскаллаяр хъунмасса МахIачкъалаллал МФЦ-лун ва чIирисса давур, куну. Ва ххи бувунни чIал къавхьуну ми центрдайн бивну, миккусса иш-тагьар ххал дантIишиву, халкьуннахь центрдал давурттаясса цIухху-рухху бантIишиву.
ХIакьинусса кьининин чIяву функцияртту бусса центрдайн кумаграл хъирив бувкIун бур 6% халкьуннал. 2015 шинайннин ва тагьар даххана данмур бантIиссар, 90,4 % халкьуннаща цалва мурадру щаллу бан бюхъантIиссар республикалул МФЦ-рдай.
Гихунмай махъру лавхъунни Каспийскаллал, МахIач­къалаллал МФЦ-рдал каялувчитурал.
КIантту-кIанттурдай тIивтIу­сса МФЦ-рдал ялувбацIаву дуллантIиссар ДР-лул Минкомсвязьрал, ДР-лул Антимонопольный къуллугърал цачIу. Мукунма республикалул каялувшиннарал умуд бур 90% госуслугарттал даража лахъ бансса ва гьарцагу инсан 15 минутIрал дяниву дузал ансса чаранну лякъинсса.