Февраль зурул 15 – нний МахIачкъалаллал 37 – мур школа-гимназиялий хьунни «Тебе доверяет Родина» тIисса аьрали-патриотический клубрал ирглийсса бяс-ччал. Цувгу хас бувну бия Ватан дуруччултрал кьинилун. Му сакин бувну бия ДР – лул жагьилтурал иширттал комитетрал жагьилтал ва оьрчIру ватан ххирану тарбия баврил центрданул кумаграйну. Клубрал дуллалисса гьарцагу даву хас дувайссар билаятрал тарихраву агьамсса кIану бувгьусса иширан.

Зулайхат Тахакьаева
Клуб цуппа сакин бувну бур 2000 шинал, Хъун дяъвилуву Ххувшаву ларсун 55 шин шаврин хасну. Клубрал цачIун буллай бур, цавунгу шагьрулул личIи-личIисса школардаясса 3517 дуклаки оьрчI ухлахисса 26 филиал.
Микку ми куннащал ку бяс-ччаллий лахьлай бур кьюкьрай бацIан, ттупанча батIин, противогаз лаххан, 16 кило дусса гира гьаз дан ва ттупанг битлан. Шикку чIун-чIумуй шай аьдатсса аьрали спортрал конкурсру: «Красив в строю, силен в бою», «Тяжело в учении, легко в бою», «Кто из нас самый сильный», «Снайпер».
Ирглийсса конкурсрайн оьвкуну бия Дагъусттаннал ветерантурал советрал члентурайн, аьрали комитетрал, кIулшиву дулаврил управлениялул ва оьрчIал творчествалул къатлул зузалтрайн, школарттал директортурайн.
БатIаву тIитIлай, клубрал хъунама, полковник Заланскийл кIицI лавгуна конкурсралгу, аьмну клуб­ралгу агьаммур мурад хъанахъишиву жула жагьилтал ватан дуручлан хIадур баву. Бувсуна гьашину кIулшиву дулаврил управлениялул, оьрчIал творчествалул къатлул, жагьилтал ва оьрчIру ватан ххирану тарбия буллалисса центрданул каялувшиннарай МахIачкъалаллал чIявусса школарттай хьунтIишиву «Мы будем верой и правдой служить России» тIисса аьрали конкурсру. Школарттал учительтурал цIания барча бувна, цала жанналий хIайп къакуну, душманная жува бурувччусса Хъун дяъвилул ветерантал, хIакьинусса кьинигу ярагъ кIунттихьну жула билаятрал ялун бучIантIимур буручлачисса аьралуннал ва флотрал ветерантал Ватан дуруччултрал кьинилущал.
Сталинград фашистурая мурахас бувну 70 шин там шаврил юбилейран хасну клубрал дунни Хъун дяъвилул ветерантуращал­сса хьунабакьавуртту, ялув кIицI лавгсса аьрали спортрал журардал ва ватандалухасса балайрдал конкурсру.
Бяс-ччал байбишин хьхьичI конкурс бачин буллалиминнал бувсуна дуклаки оьрчIахь та Хъун дяъвилул тарихраву яла оьсса талатаврия, ЯтIул Аьралуннал дурсса виричушивурттая, Вирттаврал цIардан лайкь хьуминная. Тарихраву мусил хIарпирдай чирчуну душиву кIицI лавгуна Москав, Севастополь, Ленинград, Сталинград, Одесса, Киев, Брест къала буруччавриву, Днепр нех лахъавриву, Берлин ласавриву гьуртту хьусса вирттал, панфиловцынал ва Ольшанскийл десантниктурал чумартшиву.
Конкурсрай хъунмур къулагъас дурну дия Сталинградрай душман ххит аврин.
Хъун дяъвилий дурсса чувшивурттахлу 11600 аьраличу лайкь хьуну ур Совет Союзрал Виричунал цIардан. Совет аьралуннал аьрали-хьхьирил флотрал ххит бувну бур 506 душманнал ва 100 гитлердул чул бувгьуминнал дивизия. Артиллеристурал ххит дурну дур 75 азарда душманнал танка, летчиктурал ххит дурну дур 55 азарда душманнал самолет, хьхьиричитурал бюкьан бувну бур 700 жами. Ххувшавриву агьамсса кIану бувгьуну бур дяъвилул къинттуллух зий бивкIминналгу.
Тарихраясса кIулшивурттаяр ххишала клубрал гьурттучитурал ккаккан дуруна спортрал хIадуршиннагу хьхьичIунсса душиву. Клубрал члентал ватан дуручлан хIадур бавриву агьамсса къулагъас дуллай бур кьюкьрай бацIаврих, цанчирча му ккаллину дур аьрали кIулшиву дулаврил ва тарбиялул ца агьаммур бутIун. Мунил кабакьу буллай бур аьралитурал журат ххуй дан, занакьулушин магьир дан, чурх бугьан лахьхьин. Хъуннасса къулагъас ялагу дуллай бур гьарца журалул ярагъуннива битан лахьхьин баврих. Му бакъассагу, аьрали къуллугърал ца агьамсса бутIану хъанахъиссар талатаврийн хIадур баву, калашниковлул автомат батIаву, ппив баву.
Клубрал даврин кабакьу буллалисса республикалул жагьилтал ва оьрчIру тарбия баврил центрданул каялувчи Заур Оьмаровлул бусласимунийн бувну, ва кьяйдалул конкурсирдал жагьилтуравун гъира бутлатиссар, хIакьсса ватан дуру­ччулт тарбия буллалиссар.
Ихтилатирттая махъ байбивхьуна бяс-ччал. Лях-карах бия ватандалухасса балайрду ва миллатирттал къавтIавуртту. Бяс-ччал къуртал хьуну махъ центрданул зузалтрал бахшишру ва грамотарду дуллуна гьарцагу аьрали спортрал журалуву хьхьичIун ливчуминнан. Ялун нанисса ник ватан ххирану тарбия давриву буллалисса захIматрахлу дипломру буллуна учительтурангу.
Укунсса давуртту клубрал дайсса дур сайки гьарца зуруй, МахIачкъалаллал 5 – 6 школалул гьурттушиннарайну. Миннуй гьуртту шайсса бур 100 – 120 дуклаки оьрчI.