Хасавюртлив лакрал дуллалисса гьарцагу давривух хIала увххун, цалва миллатрал цIа сийлий личIанмур буллалиминнавух кIицI лагай Дагъусттаннал университетрал филиалданул хъунаманал хъиривчуну зузисса аьлимчунал, Мусал арс Мусаев Мирзал цIа. Му Чапаевкаллал шяраватусса ур, юридический элмурдал кандидат, РАЕ-далул профессор ур.

КIива душ, ца арс бур Мирза Мусаевичлул. Халкьуннал тарбиялул куртIсса гьанурду гьануну лавсун тарбия буллай ур ва цалвами оьрчIругу, студентъталгу, так мукун тарбия хьусса оьрчIалли дикIантIисса ларайсса аькьлу-кIулши, мяърипат ва инсаншиврул арарду тIий ур.
1999 шинал, Дагъусттаннал паччахIлугърал университетрал Элмийсса советрал хIукмулийн бувну, Хасавюртлив экономикалул ва праволул факультет тIивтIуну бур. 1997 шинал, Аьрасатнал Минобразованиялул хIукмулийн бувну, хIасул бувну бур университетрал филиал.
ХIакьину микку бур шанма факультет: юридический, социальный ва экономический. Бур 4 кафедра, зий бур 8 профессор, 3 элмурдал доктор, 45 доцент, элмурдал кандидатътал.
Махъсса ххюра шинал лажиндарай филиалданул преподавательтурава кIиннал дурурччуну дур элмурдал доктортал хьунсса диссертациярду, урчIуннал – элмурдал кандидатътал хьунсса.
Мирза Мусаевичлущалсса ихтилатраву найбунува жу хIазран къабувкру диссертациярдайн ва профессортурал аьдадрайн. Дагъусттаннал бакIчинал къуллугъ чIумуйну биттур буллалисса Рамазан АьбдуллатIипов хъинну рязий акъа ур филиалдануву цIанихсса аьлимтал зий бакъар, ми циняв лакьин аьркинссар, я куртIсса кIулшивуртту дулавриха, я элмулуха зий бакъар студентътал тIий.
Цалчинсса суалгу жу Мирза Мусаевичлухьхьун буллуссия филиаллу лакьин аьркинссар тIисса Р. АьбдуллатIиповлул тIалавшиннарал хIакъиравусса.
— Филиаллу лакьин аьркинссар тIутIаву къатIайласса пикрир, студентътал дуклай бур шиккува, нитти-буттахъал чIарав. ЦIанакул нитти-буттахъан оьрчIру общежитиярдай яхъанай ччай ба­къар, лаякъатта бугьансса кашигу гьарманачIа дакъар, — тIий ур Мирза Мусаевич. – МахIачкъалалив оьрчIру дуккин баву нитти-буттахъан ххирану дацIлай дур. Каши дакъанугу оьрчIру дуккин бан ччиссагу бур. Вари филиалданул ца къулайшинна.
Ялагу. Филиаллай студентътал чанну бур, преподавательтуран ба-бакIрах хъинну кIулссар цума студент ци бюхъу-хIарачатрал, ци хасиятрал заллу уссарив. Аьмну жучIа ур 1720 студент. Ми аудиториярдаву циняв итталу буссар.
Мирза Мусаевичлул бувсунни филиалданул кафедрартту, студентътал элмулухун багьаву мурадрай, тамансса давурттив дуллай бушиву, 5 элмийсса кружокру душиву: «Юридическая клиника», «Экономика», «Поиск» ва цаймигу. Махъсса шиннардий филиалданул преподавательтурал итадаркьуну дур кьуниясса монографияртту. Университет­раву ва республикалий хъанахъисса мероприятиярдавух мудангу хьхьичIунсса гьурттушинна дайсса дур студентътурал. Хьунабакьайсса бур дяъвилул ва захIматрал ветерантуращал, творчествалул интеллигенциянащал, динчитуращал.
Филиалданул студентътурал ва выпускниктурал дянив бур ччарча Олимпий чемпионтал (Мурад Умаханов, Мавлет Батыров), ччарчагу дунияллул чемпионтал (МахIач Муртузялиев, Билял Махов).
Преподавательтураву бур тамансса лак. 45 студент ур лакрал, ми чIявуми ЦIуссалаккуятусса бусса бур.
Преподаватель, аьлимчу ва каялувчи хIисаврай акъагу, жяматрал ишккакку хIисаврайгу сийлий ур Мирза Мусаевич. Му ур муниципал образованиялул бакIчиначIасса Жяматрал совет­рал член.