Февраль зурул 8-нний Журналистурал къатлуву цIуницIа Дагъусттаннал информациялул ва печатьрал министрну ивтсса УмархIусман ХIажиев хьунаавкьунни респуб­ликалул СМИ-рдал зузалтращал.

П. Рамазанова
Микку гьуртту хьунни ДР-лул ХIукуматрал цалчинма хъиривчу Анатолий Карибов ва Дагъусттаннал Журналистурал союзрал председатель Аьли Камалов. Мунал барча бунни цIуну къуллугъирттай бивтсса А. Карибов ва У. ХIажиев.
«Анатолий Карибов идеологиялул даврил ялувацIаву дуллан най ушиврия жу ххариссару, му даву ххуйну кIулсса, хъинну хъирив лавну даву дувайсса инсан уну тIий. ХIадурссару мунан кумаг буллан», — увкунни Аьли АхIмадовичлул.
Информациялул ва печатьрал министрнал къуллугърай ивтсса У. ХIажиевлул хIакъиравугу мунал кунни: «УмархIусман ХIажиев ва къуллугърайн зана шаву – му ххуйчулиннайсса дахханашивур. Ва ур тамансса шиннардий жущала зий ивкIсса, жуна кIулсса инсан.
Жулва хIалкьазия, тагьар кIулсса минахур. Ванал кумаграйну жулла даву дузрайн ду­ккан дуллантIиссару».
Анатолий Карибовлул кIицI лавгунни республикалий ххуйсса оьрму дузал бавриву журналистуралмур бияла хъуншиву, миннайн мукьилчинмур власть хIазран къаучайшиву.
УмархIусман ХIажиевлул цалвамур ихтилатраву чIурчIаву дунни гьамин журналистурал хIарачатрайну байшиву властьрал ва агьалинал дянивсса ламу, уттиния тинмайгу республикалул журналистал мувра тарап дургьуну зунтIишиву. Мунал кIицI лавгунни миллатирттал культуралух, мазурдих хъунна­сса къулагъас дикIантIишиву, республикалул цIусса властьрал хьхьичI бивхьусса масъаларттаха чялишну зунтIишиву.