Февральданул 4-нний ДР-лул ЦIуллушиву дуруччаврил министерствалий ДР-лул Президентнал кIанайма Рамазан АьбдуллатIиповлул ккаккан унни цIусса министр Танка Ибрагьимов.

Жагьилсса оьрмулуву цувагу фельдшерну зий ивкIсса Рамазан АьбдуллатIиповлул республикалул тагьар лащан дунни къашавайсса инсаннаха. Амма цила чIумал азар кIул дурукун ва тIайлану хъин дуллаликун, гьарза даххана дан шай­ссар. Республикалул цIуллушиву дуруччаврил системалия ихтилат буллай, республикалул бакIчинал бувсунни хъинну бигьа дакъасса чIумал Илияс Маммаевлуща бювхъуну бушиву система ядан.
Рамазан АьбдуллатIиповлул бувсмунийн бувну, га лавгун ивкIун ур МахIачкъалаллал, Къизилюртуллал, ТIиларатIиял, Шамиллул, Гергебиллал районнал хъин бай учреждениярттайн, чIявуми кIанттурдай укуннасса низамрагу дакъасса дур.
«Бигьанна хъин дайсса азарду хъин дангу Москавлив най бур, цанчирча цукунчIавсса вихшала дакъар Дагъусттаннал духтуртурайн. Жулва духтуртурал кIулшиврул даража ялавайсса бур тIий на акъара, ялунгума, на тасттикь буллай ура жулва духтуртал Москавуллал ва цайми регионнал духтуртураяр ссалчIав ялавайсса бакъашиву.
Вихшала кьукьаврил савав цамур дур. Цаягу республикалий­сса каялувчи МахIачкъалалив хъин хъанай акъар. Цинявннан ххай бур Москавлив хъин хьун гьан аьркин­сса кунма.
Духтуртуращалсса хьунабакьаврил хIасил дуллай, Рамазан АьбдуллатIиповлул бувсунни, жува капитализмалий яхъаначый бунува, цIуллушиву дуруччаврил система социализмалул­сса лирчIун душиву. Мунийн бувну, ганал пикрилий, бю­хъайссар жучIава цIусса цивппа заллусса клиникартту хIасул хьун, цIанасса цIуллушиву дуру­ччаврил объектру бюхъайссар багьлух ласунгу (приватизация). Мукунсса системалий къуццу тIий бур иширайну щалла дунияллийсса билаятру, жувагу ми­ккунма бучIан аьркинссару. Му системалий къадикIантIиссар лурттурасса ласавуртту ва цаймигу диялдакъашивуртту», — увкунни ганал.
БавтIминнал хьхьичI ихтилат бунни цIуну ивтсса министр Танка Ибрагьимовлул.