Органы прокуратуры РД рассмотрели в 2012 году 13 тыс. 229 обращений, что на 252 обращения больше, чем предыдущем году.
ДР-лул прокуратуралул органнал ларгсса 2012 шинал ххалбивгьуну бур цачIанма бувкIсса 13 азаллий 229 аьрза, хьхьичIмур шиналнияр 252 аьрза ххишалану.
Прокуратуралул вакилнал бусласимунийн бувну, аьрзри бур агьалинаягу, ихтиярду дуруччайсса ва жяматийсса организациярдаягу. Миннува 2066 аьрзирал (24%) мурад щаллу бувну бур прокуратуралул органнал. Миннул хIакъираву шагьрурдал ва районнал прокурортуралгу, прокуратуралул подразделенияртталгу щаллу бувну бур 112 протест, 398 представление, 1 азаллий 355 аьрза тIайла бувккун бур судрайн, 95 аьрзирал хIакъираву дюъ дирхьуну дур.
Ххалбивгьусса аьрзри чIявуми прокуратура федерал законодательство щаллу даврил ялув бацIаврийн багьлагьисса бур. Мукунсса 4 азаллий 867 аьрза (57%) ххалбивгьуну бур. Миннувух бур ялапаршиннарал (жилищное) законодательствалува бувксса иширттал хIакъиравусса 836 аьрза. Миннува 411 аьрзирал мурад щаллу бувну, тIайламур бацIан бувну бур. Аьрщарал хIакъиравусса закон къадуруччавриясса 694 аьрза бур. Миннува 113-ннил мурад щаллу бувну бур.
ЗахIматрал законодательствалуцIун къабавкьусса иширттал хIакъираву бур 626 аьрза. Миннува 343 аьрзирал мурад щаллу бувну бур.
104 аьрза бур пенсиярттацIун бавхIусса. Миннува 16 аьрзирал мурад щаллу бувну бур. Ларгсса шинал мукунма ххалбивгьуну бур силистталул хIакъиравусса 1639 аьрза. Миннува 216 аьрзирал мурад щаллу бувну бур. Му журалул аьрзирдава чIявуми бур Аьрасатнал МВД-лул следовательтурал дуллалимуния рязи бакъасса агьалинал аьрзри. Мукунсса 495 аьрза бур, миннува 73 аьрзирал мурад щаллу бувну бур.
477 аьрза бур АьФ-лул Силистталул комитетрал силистталул органнал каялувчитурал ва следовательтурал даврия рязи бакъасса. Миннува 55 аьрзирал мурад щаллу бувну бур. 471 аьрза бур Аьрасатнал МВД-лул дознаниялул органная рязи бакъасса. Миннува 76 аьрзирал мурад щаллу бувну бур.
Уголовный делордал хIакъираву судрал бувсса хIукмурду цуксса тIайласса, закондалуцIун бавкьусса бурив ххал бигьаву тIалав дуллалисса 303 аьрза бур. Мукунма граждан делордал хIакъиравуми хIукмурдал тIайлашиву ххалбигьаву тIалав дуллалиссагу 273 аьрза бур.
2012 шинал прокуратуралул органнал кьамул увну ур 9077 инсан. Миннава 1815 инсан прокуратуралул аппаратраву кьамул увну ур, 175 инсан республикалул прокурорнал цала ва мунал заместительтурал кьамул бувну бур.
Республикалул прокуратуралул органнал ларгсса шинал мукунма ххалбивгьуну бур ацIния ххюра Аьрасатнал ва регионнал ихтиярду дуруччайсса ва цаймигу жяматийсса организациярдаясса, мукунма Аьрасатнал ва Дагъусттаннал инсаннал ихтиярду дуруччаврил уполномоченныйтураясса, ДР-лул Жяматийсса палаталиясса ва цаймигу идарарттаясса 73 аьрза.
Ларгсса шинал дурсса даврил ккаккияртту оьккисса къархьунугу, цаппарасса прокуратуралул зузалт жаваблувшиннарайн кIункIу бувну бур цила чIумал ва аьркинсса куццуй цачIанма бувкIсса аьрзри ххал къабивгьуну тIий.
