Февральданул 6-нний ДР-лул Президентнал кIанайма Рамазан АьбдуллатIипов лавгунни Дагъусттаннал Ухссавнил чулийсса ца­ппара районнайн ва шагьрурдайн. Республикалул бакIчинал ххал бунни цаппара цIуну буллалисса объектру ва зузисса предприятияртту.

ДР-лул Президентнал прессалул къуллугърал бувсъсса куццуй, респуб­ликалул бакIчинащал архIал бивзунни республикалул ХIукуматрал Председательнал хъиривчутал Ризван ГъазимахIаммадов, Абуссупиян Хархаров, цаппара министерстварттал каялувчитал ва районнал ва шагьрурдал бакIчитал.
Рамазан АьбдуллатIипов цалчин ивунни Къоркмаскъалалив, цIухху-бусу бунни шяраваллил бакIчинащал. Республикалул бакIчинал тапшур бунни шяравалу низамрайн дуцин, республикалул ХIукуматрайн тапшур бунни республикалул шяраваллаву чIиримур ва дянивмур даражалул ишбажаранчишиву лядуккан даврил хIакъиравусса предложенияртту хIадур дуван.

Яла Дагъусттаннал бакIчинал ххал бунни Къумтуркъалаллал райондалий буллалисса Каспийскаллал пюрундалул завод. Ризван ГъазимахIаммадовлул бувсунни заводрал хIалкьазиялия. Рамазан АьбдуллатIиповлул хъинчулий ккарккунни завод баврил давуртту. «Вана укунссар бикIайсса Европанал даража», — увкунни давурттая рязину ливчIсса республикалул бакIчинал.
Учкентуллал шяраву республикалул бакIчинал кIанайма кIул хьунни хIакинтурал амбулаториялул давурттащал. Ганал тапшур бунни медициналул учреждение низамрайн буцин.
Къизилюртлив Рамазан Аьбдул­латIипов лавгунни оьрчIал спортрал школа ххал бан, ганияту рязину ливчIунни. Тава шагьрулий Дагъус­ттаннал бакIчинал ххал бунни муххал ххуллул вокзал ва хъинну гьалак увккунни тиккусса тагьар ккарккукун. Ганал тапшур бунни вокзал лази-лакьин бан. ДР-лул бакIчинал республикалул ХIукуматрал вице-премьертурайн тапшур бунни ми циняв масъаларттан хасъсса совещание дуван, муххал ххуллул каялувчитурайнгу, муххал ххуллул полициялул каялувчитурайнгу оьвкуну.
Яла Дагъусттаннал бакIчи лавгунни Хасавюртлив, тикку дунни активрал совещание.
Совещаниялийн бавтIминнахь Рамазан АьбдуллатIиповлул бувсунни Дагъусттаннал Ухссавнил чулийсса районнай, шяраваллаву ккарксса диялдакъашивурттая, бувсунни мукунна ххуйми давур­ттаятугу. Ганал муниципалитетир­ттал бакIчитурайн тапшур бунни мюнпатну зун.
«ХIакьину ихтилат най бур рес­публикалул марцI-чапалшиврия. Жулва яла захIматмур масъала – жува чапалшивруву яхъанай аьдат шаву бур. Жунма хIисав хъанай бакъар цуксса зия дуллай дуссарив лагмасса тIабиаьт. Дагъусттан Рес­публика – му жулла лажинни.
Жува буру жучIара ихтиярду (полномочияртту) диялсса дакъар тIий. МарцIшиврий ва низамрай яхъананшиврул ихтиярду къааьркинссарча, виваллил культурар аьркинсса.
Къумтуркъалаллал район МахIачкъалаллал дазуцIун дирну дур. Тикку аьрщив дачIлай бур, шагьрулул чIалачIин цукунсса дикIантIиссарив, мунил пикри буллай бакъари. МахIачкъалалив шагьрулувун буххайсса кIанай бухсса машинарттал «хIатталу» дур, ччюрклил бакIурду бур. Мукунна­сса тагьар дур Къоркмаскъалаливгу, Къизилюртуллал райондалийгу. Хасавюртуллал ва Хасавюртуллал райондалул бакIчитуран аьркинни цачIу шагьрулувун буххайсса кIанттурду низамрайн буцин. Мэр – га цалла аьрщарал заллур, га буржлувссар цалва кIанттурду низамрайн буцин.