Январьданул 22-нний «Дагестанская правда» кказитрал редакциялий хьунни ядан дирхьусса арцурду (вклады) дуруччайсса Агентствалул гендиректорнал хъиривчу Андрей Мельников гьурттусса он-лайн конференция.

Тикку гьуртту хьунни ДР-лул Хъунмур банкирал председательнал хъиривчу Шамил Абуев ва ядан дирхьусса арцу дуруччаврил Агентствалул жяматийсса дахIавурттал центрданул каялувчинал хъиривчу АхIмад Жаманов. Конференция буллай бия «Зеркальный мир» телеканалданул кумаграйну.
Андрей Мельниковлул гьартану бувсунни «Экспресс» банкирайн ядан дуллуну диркIсса арцурду махъуннай зана даврил хIалкьазия цукунсса бикIантIиссарив. Мукунна ганал жавабру дуллунни «Дагправдалул» электроннал адресрай буллуну бивкIсса суаллахьхьун. Та конференциялий гьуртту хьуссар республикалул СМИ-рдал журналистъталгу.
Агьалинал дирхьуну диркIсса арцу хIисавну «Экспресс» банк республикалий яла хъунмур бивкIхьурчагу, А. Мельниковлул кьянкьану махъ буллунни, циняв дирхьуну диркIсса арцурду зана дан бюхъантIишиврий. Ганал мукъурттийн бувну, яла гъансса чIумуву хасъсса конкурсрай батIул бантIиссар банкру-агентътал, миннуйхчил дуллантIиссар дурурччусса арцурду февральданул 4-яр чIал къавхьуну. Банкирал дурурччусса арцул лагру хIисавну дур 700 азарда къуруш. Амма балжину лахъансса цинярда арцул лагру ккаккан дантIиссар АСВ сайтрай кIира нюжмардиува.