ЦIусса шинавун цIусса умудирттащал

ilfoto_13Декабрь зурул 28-нний Гъумучиял клубраву хьунни ЦIусса шинал байран.  Муний гьуртту хьунни «Лакрал район» МР-данул бакIчи Юсуп МахIаммадов, Лакрал райондалул администрациялул бакIчи Абакар Къюннуев, райондалул администрациялул бакIчинал хъиривчу Юсуп Рамазанов, идарарттал хъуними.

Зулайхат Тахакьаева
«Лакрал район» МР-данул бакIчи Юсуп МахIаммадовлул райондалул агьали  барча буллай ялун нанисса шинащал, кIицI ларгуна ларгсса шинаву райондалий хьусса хьхьичIуннайшивуртту. Ми хьхьичIуннайшивуртту хьуншиврул захIмат бивхьусса зузалтран дуллуна райондалул администрациялул чулухасса хIурматрал грамотарду ва арцуйнусса бахшишру, ялун нанисса шинаву чIа увкуна тIайлабацIуртту.
Райондалул бакIчинал хъирив, шадлугърайн бувкIми барча бан махъ буллуна цаннаяр ца балгусса мюрщултрахьхьун – детсадравун заназиминнахьхьун. СахIналий бивхьусса чIюлува-чIюлусса  вацIлул ссурухIилуха вайннал дурккуна назмурду, увкуна балайрду.  Хъирив яржа бивуна Гъумучиял школалул ва лицейрал дуклаки оьрчIайн. ОьрчIайх ссайгъатру бачIлай бия Дякъил Ттатта ва Марххаладушгу. Хъирив шадлугърал махъгу-кьуругу лавсуна Гъумучиял магьирлугърал школалул дуклаки оьрчIал. Гихунмай райондалул агьали барча бан балайрду увкуна Гъумучиял магьирлугърал къатлул зузалтрал: Гулизар Ибрагьимовал, АьлихIажи Шамххаловлул, Мариян Жамалуттиновал, Щаза Саидовал, Эмилия МахIаммадовал. Усттарну шадлугъ дачин дурну ия гьунар бусса балайчи АьлихIажи Шамххалов.