ЦIусса журалул теплицарду буллай бур

sobЯнварьданул 21-нний ДР-лул Президент МахIаммадссалам МахIаммадов лавгунни «Новокулинское» КФХ-лул аьрщарай «Нива» СПК-рал буллалисса теплицардал комплекс ххал бан. Президентнащал архIал лавгунни ДР-лул Халкьуннал Мажлисрал аграрий политикалул комитетрал председатель Жапарбег Щамххалов, ДР-лул шяраваллил хозяйствалул министр Сатмар Амиров, ДР-лул финансирттал министр Аьбдуссамад ХIамидов, ДР-лул экономикалул министр Марат Илиясов ва цаймигу.

«Нива» СПК-рал каялувчи Умар Мусаевлул бувсъсса куццуй, тикку ишакаш буллай бур «Свежие овощи» цIанилу теплицардал комплекс 12 гектар аьрщарай. Укунсса пленкардал ягу поликарбонатрал магъи дусса конструкциярду машгьурну бур щалла дунияллий.
Инвестициярдал проектрал каялувчи Аьвдуллагь Мусаевлул мукъурттийн бувну, теплицарду гъили буллай бур лухччинува дуклакисса кIири щинал. Теплицалуву ишла дуллай бур кIунтIру бутIлатIисса щин дишаву (капельное орошение). Га хьхьичIунсса технологияр. Гай щинаву дуссар ххяххиярттан аьркинсса затру (гидротоника).
Проект так ца ва теплицалийну къуртал къахъанахъиссар – республикалул аьрщарай буллантIиссар ттизаманнул теплицардал комплекс, цIусса кьай-кьуйлул щаллу бувсса, цIусса технологияртту ишла дуллалисса. Тикку дугьлантIиссар теплицардал бизнесраву ишла дайсса ахънилсса. Тукунсса технологияртту ишла дуллай бур цIана Турциянаву, Голландиянаву, Франциянаву, Финляндиянаву, Израилнаву, Испаниянаву. Проектрал багьа бур 540 млн. къуруширттал. Тикку зунтIиссар 180 инсан.
Яла МахIаммадссалам МахIаммадов ва ганащал архIал бивзми лавгунни шяраваллил хозяйствалул техника дартIун щаллу дайсса ОАО «Дагагроснаб» базалийн. Тикку ДР-лул Президент кIул хьунни производствалул иширащал, цIухху-бусу бунни предприятиялул каширдал, бюхъулул хIакъираву.
Ва предприятиялул директор Чамсуттин Мутаевлул бувсъсса куццуй, «Дагагроснабрал» 60-яр ххишаласса шиннардий ДР-лул агропромышленностьрал комплекс щаллу буллай бур материаллал ва техникалул. ХIакьинусса кьинигу предприятиялул датIлай бур нигьирттайсса тракторду, республикалул заводирттащалгу хIала-гьурттуну зий бур. 2013 шинал «Дагагроснабрал» итадакьин тIий дур 250 трактор.
«Тракторду дуккан дуллалаврил бущи анавар буккан буван аьркинссар, предприятиялул заявкарду чIярусса дур. МуницIун лизингирдал каширдугу ишла дуллан аьркинссар», — увкунни Дагъусттаннал бакIчинал. Ганал бакIрайн лавсунни, мукунма, республикалул чулуха кумаг бан субсидиярттайну.