На прошлой неделе в Махачкале в Большом зале Русского театра прошел вечер памяти дирижера, композитора, аранжировщика Шамиля Ханмурзаева. На днях «Заслуженному деятелю РФ», «Заслуженному деятелю искусств РД» Шамилю Гамидовичу исполнилось бы 70 лет…
25-нний Оьруснал музыкалул ва драмалул театрдануву хьунни дирижер, композитор, аранжировщик Шамил Ханмурзаевлул аьпалул вечер. 2003-ку шинал аьпалул хьусса Шамил ХIамидовичлун вай гьантрай 70 шин хьунтIиссия.
«АьФ-лул искусствалул лайкь хьусса ишккакку», «ДР-лул искусствалул лайкь хьусса ишккакку» Шамил Ханмурзаевлул юбилейрал вечерданийн, цIанихсса дирижер дакIнийн утан бавтIун бия Оьруснал театрданул Хъунмур зал бувцIусса инсантал. Му батIаву дачин дурну бия Дагъусттаннал паччахIлугърал филармониялул художествалул каялувчи Ирина Нахтигаль. Музыкалулми номердал лях-карах Ирина Германовна буслай бия цIанихсса дирижернал оьрмулия ва творчествалия.
[pullquote]Шамил Ханмурзаевлул цIа мусил хIарпирдайну чирчуну
дур Дагъусттаннал музыкалул культуралул тарихраву.[/pullquote]
Шамил Ханмурзаевлул цIа ца Дагъусттаннай дакъассагу, мунил кьатIувгу машгьурну дур. Мунал цIа мусил хIарпирдайну чирчуну дур Дагъусттаннал музыкалул культуралул тарихраву. Шамил Ханмурзаевлул бувккуну бур 2 консерватория: Саратовуллул ва Ленинградуллал. 1969-ку шиная айивхьуну зий ивкIун ур МахIачкъалаллал музыкалул училищалуву педагогну ва хорданул каялувчину, махъ «Дагъусттан» ГТРК-лул симфонический оркестрданул художествалул каялувчину ва хъунама дирижерну. Мунал хIарачатрайну, 1994 шинал Дагъусттаннал композитортурал произведенияртту Щаллагу Союзрал телерадиофондран чивчуну бур. Мунал каялувшиннаралу 1994 шинал симфонический оркестр гьуртту хьуну бур Н. Дагировлул «ПартIу ПатIима» балетрал постановкалуву, ца-кIира шинавун – Дагъусттаннал миллатрал цалчинсса опера, ХI. ХIасановлул «Хочбар» бихьлахьийни. Ванал каялувшиву дуллалисса оркестр мудангу язиминнавух, хьхьичIунминнавух, лавайминнавух бивкIун бур. Му оркестрданул хьхьичIва-хьхьичI щаллу бувнугу бур Дагъусттаннал композитортурал чивчумур. 1996-ку шиная цалва оьрмулул махъра-махъсса кьинилийннин Шамил Ханмурзаев ивкIун ур Дагъусттаннал паччахIлугърал опералул ва балетрал театрданул хъунама дирижерну ва художествалул каялувчину. ХьхьичIунну гьуртту хъанай ивкIун ур республикалул жяматийсса оьрмулувухгу. МахIачкъалаллал музыкалул училищалуву акъассагу, дарсру дихьлай ивкIун ур Т. Мурадовлул цIанийсса оьрчIал музыкалул школданийгу. Ми цимурцаннуцIун, футболданий уккансса чIунгу лякъайсса диркIун дур. МахIачкъалаллал цачIун дур командалувун ухлай ивкIун ур. Мунал бувсса захIматран паччахIлугърал лавайсса кьимат бишлай, мунан дуллуну дур ларайсса цIарду ва наградарду: «Аьрасатнал Музыкалул обществалул лайкь хьусса ишккакку», «Аьрасатнал искусствалул лайкь хьусса ишккакку», «Дагъусттаннал искусствалул лайкь хьусса ишккакку», Дагъусттаннал ПаччахIлугърал премиялул лауреат, Дагъусттаннал педуниверситетрал профессор. Дазу дакъасса грамотарду, Барчаллагьрал чагъарду хIисаввагу къабулланну.
Ва вечерданий махъру лавхъунни ДР-лул Композитортурал союзрал председатель Рамазан Фаталиевлул, композитор, ДР-лул Музыкантътурал союзрал председатель Хан Башировлул, музыковед, телеведущая Зарема Буттаевал ва цайминналгу.
Вечерданул ахирданий Шамил Ханмурзаевлул уссу, филологиялул элмурдал доктор, профессор, Дунияллул халкьуннал дянивсса Гетел цIанийсса обществалул член Камил Ханмурзаевлул цалва чулуха, агьлу-авладрал чулуха барчаллагь увкунни ва вечерданийн бувкIун, цала уссия аьпалул махъру увкуминнахь, га хъамакъаитайминнахь.
