ЦIусса шинал каникуллу дайдирхьуну, зузими ва дуклакими бигьалаган шаппа-шаппа щябикIаннин, ЦIусса шин дучIаннин республикалул шагьрурдай ва районнай хьунни ЦIушинал байрандалун хас дурсса чIярусса шадлугъру. Ца мукунсса, яла чIявусса халкь бавтIми шадлугъирттавасса цану хьунни декабрьданул 28-нний МахIачкъалалив «Сокол» стадиондалий хьусса республикалул ЦIушинал елка. Мунил сакиншинначину бия ДР-лул КIулшиву дулаврил ва элмулул министерство.

Бадрижамал Аьлиева
Ва байрандалийн бувкIун бия республикалул шагьрурдаясса ва районнаясса азарунния ливчусса дуклаки оьрчIру, хъунмурчIин дуккавриву ва спортраву хьхьичIунсса ккаккиярттайн лавхъми, оьрчIал къатрал, школа-интернатирттал тарбиячитал. Лакралми районнава хIисав хьуна Новостройраясса Шушиннал школалул вакилтал.
Ва шадлугърал вирдакIну ва хъунмур чIюлушиннану дия Дарбантуллал ОьрчIал творчествалул къатлул зузалтрал хIадур дурсса ЦIушинал программа «Приключение у елки» цIанилусса. Ва байрандалийн оьрчIачIан хъамалу бувкIун бия магьрал яла яргми, яла машгьурми вирттал. Байран цалла къавтIаврийну чIюлу дунни «Ватан» къавтIаврил ансамбльданул.
Байрандалийн бувкIуна ДР-лул Президент МахIаммадссалам МахIаммадов, ДР-лул Халкьуннал Мажлисрал председатель МахIаммад-Султан МахIаммадов ва цаймигу хIурмат бусса хъамал. МахIаммадссалам МахIаммадовлул республикалул оьрчIахь увкунни:
— Барча буллай ура зу ялун нанисса ЦIусса шинал байрандалущал, чIа тIий ура зун чIяру-чIярусса бахшишру, зурив нитти-буттахъан бахшишран ххуйну дуклакияра. Оьрмулул хъуниминнах вичIидилушара ва ххирану бикIира зулла ватан – Дагъусттан, — куну.
Президентнал лагма лавгун, мунаща автограф ласлай, мунащал суратру ришлашисса оьрчIру чIявуя. Махъ хьунни лотерея духхаву. Байрандалийн увкIсса гьарцагу оьрчI лайкь хьуна ЦIушинал бахшишран.