«Илчи» кказитрал хьхьичIвами номердайгу чивчусса куццуй, Дагъусттан Республикалул КIулшиву дулаврил ва элмулул министерствалул, КIулшиву дулаврил зузалтрал профсоюзрал Республикалул комитетрал, педагогикалул кадрардал пишакаршиву ларай дайсса Дагъусттаннал институтрал ва Тахо-Годил цIанийсса Дагъусттаннал педагогикалул элмийсса хъиривлаявурттал институтрал тIайла дуклай бур республикалул конкурс «Лучший учитель родного языка – 2013».

Бадрижамал Аьлиева
Конкурс тIайла дуклакиминнал агьамми мурадругу бур ниттил мазурдил язими учительтал ялун личин баву, миннал чIарав бацIаву ва миннал захIматран багьайсса кьимат бищаву, гихунмайгу хъиннува ххуйну зунсса гъира-гьавас миннаву чантI учиншиврул, ниттил мазрал дарсирал сий дуккаврил идарарттаву гьаз даву, республикалул ниттил мазурдил учительтурал педагогикалул язимур опыт кIибачIаву.
Ва конкурсрал цалчинмур этап хьуссар ларгсса шинал ноябрь-декабрьданий кIантту-кIанттурдайра. КIилчинмур хьунтIиссар ва шинал январь-февральданий. Му дантIиссар районнал ва шагьрурдал УО-рдал. Шамилчинмур этапгу хьунтIиссар, ДР-лул КIулшиву дулаврил ва элмулул министерствалул сакиншиннарайну, ва шинал март зуруй. Ва конкурсрал махъра- махъмур, шамилчинмур, этап сакин хьуну дур цаппарасса турдая: «Самопрезентация», «Учитель-предметник», «Учебное занятие по предмету», «Классный час», «Родительское собрание». Миннул хIасиллайн бувну, хьхьичIун ливчуминнан булунтIиссар хьхьичIунсса шанма кIану. Ялугьланну ва конкурсрал хIасиллах.