Ноябрь зуруя шихуннай дайдирхьунни районнал ва республикалул лагрулийсса олимпиадартту. Чялишсса гьурттушинна дуллай бур ми олимпиадарттай Лакрал райондалул дуклаки оьрчIру.

Зулайхат Тахакьаева
Вай гьантрай оьрус литературалул республикалул олимпиадалий кIилчинмур кIану бувгьуну бувкIунни КIундиннал школалул 9-мур классрал дуклаки душ ХIажиева Ромила. Сайки ряхцIалунничIан бивсса дуклаки оьрчIру гьурттусса олимпиадалий кIилчинмур кIану бугьаву къаоьккисса ккаккияр. Олимпиадалий Ромилал ххаллилну биттур дурну дур Твардовскийл ва Заболоцкийл шеърирдал лащаву ккаккан дуллалисса анализ дансса даву. Ромилал олимпиадалий хьхьичIунсса ккакrияртту хьун хIарачат бувну бур оьрус мазрал ва литературалул дарсирал учительница Хуцаева Миясатлул ва Ромилал цила ниттил, ххаллилсса педагог Абакарова Абризатлул. Ттининнингу Ромилал кIилчинсса кIантту бувгьуну бур «И гордо реет флаг державный» ва «Мы дружбою народов едины» тIисса республикалул конкурсирдай. Вай гьантрайгу Ромила гьуртту хъанай бур республикалул биологиялул олимпиадалий.
Цалчинмур классрава тIайла хьуну урчIулчинмур классравун бияннин Ромила дуклай бур марцIсса ххювардай. Чялишсса гьурттушинна дуллай бур школалул художествалул самодеятельностьрал давриву ва жяматийсса иширттаву.
«И гордо реет флаг державный» тIисса республикалул конкурсраву канил давурттал номинациялуву Дагъусттаннал ттугъ жанграй щавщуну, цалчинмур кIану бувгьуну бур Гъумучиял лицейрал 11-мур классрал дуклаки душ Асхабова Фаридал (каялувчи Нажаева Анисат). Ва конкурсрай ялагу «Исследовательские работы» номинациялуву Дагъусттаннал гербрал ва ттугълил тарихраягу, личIи-личIисса дяъвирдаву дагъусттаннал халкьуннал ккаккан дурсса чувшивриягу бувсун, хIурматрал грамоталун лайкь хьуну бур вава классрал дуклаки душ Жалаева Рая (каялувчи Изиева Гульнара).
Лицейрал 10-мур классрал дуклаки оьрчI Къажлаев МахIаммадханнал шамилчинмур кIану бувгьуну бур республикалул лагрулийсса биологиялул ахттаршиннардал конкурсрай, Дагъусттаннай ххяххайсса дарувсса ххяххиярттаясса доклад бувну (каялувчи Ибрагьимов Сабир).
Республикалул ингилис мазрал олимпиадалий лицейрал 11-мур классрал дуклаки душ Сулайманова ПатIиматлул цIа дагьну дур яла хьхьичIунсса 10 инсаннал сияхIравун (учительница МахIаммадова Зумруд).
Сулайманова ПатIиматлул ва Сулайманова МадихIатлул давуртту гьан дурну дур «Мы дружбою народов едины» тIисса конкурсрайн. Вай гьантрай кIул хьунссар вайннал давурттал хIасиллугу. Вай кIивагу душ, ялагу, Бугьараминнал кьинилун хас бувсса, «Наши бабушки и дедушки» тIисса конкурсрай гьуртту хьуну, лайкь хьуну бур ДР- лул КIулшиву дулаврил ва элмулул министерствалул чулухасса хIурматрал грамотарттан ва Лакрал райондалул ЦСОН-далул хъунама Шяпи Щурпаевлулгу вайннан дуллуну дур арцуйнусса бахшишру (каялувчи Къапиева Написат).
Республикалул олимпиадарттай ва конкурсирдай Лакрал райондалул дуклаки оьрчIал гьурттушиннарая бусанну гихунмайгу.