Ккавкказуллал халкьуннал Аьрасатнал конгрессрал Исполкомрал цIусса председатель увчIуну усса ур. «Дагестан» РИА-лул баян баврийн бувну, председательну ивтун ур Москавуллал «Дагъусттан» культуралул центрданул вице-президент, этнополитикалул хъиривлаявуртту дуллалисса «Континент» фондрал директор, РКНК-рал (укун учай кутIану конгрессрайн) Президиумрал член, профессор МахIаммад Оьмаров. Мунал оьрмулия жунма кIулмур бусанну.

П. Рамазанова 
Аьлил арс МахIаммад Оьмаров увну ур 1965 шинал Ккуллал шяраву. 1988 шинал Дагъусттаннал паччахIлугърал университетрал тарихрал факультет къуртал бувну бур. Муния махъ дуклан увххун ур М.В. Ломоносовлул цIанийсса МГУ-рал философиялул факультетрайн. Миккува къуртал бувну бур аспирантура ва докторантурагу.
2000 шиная шинай му ур МГУ-рал аьрасатнал политикалул кафедралул профессор, доцент.
Политикалул элмурдал доктор МахIаммад Оьмаров 2008 шиная шинай ур Москавуллал «Дагъусттан» культуралул центрданул вице-президент, 2011 шиная шинай ПаччахIлугърал Думалул Миллатирттал иширтталсса буллалисса комитетрал экспертный советрал член хъанай ур. Мукуна «Континент» тIисса этнополитикалул хъиривлаявуртту дуллалисса фондрай каялувшиву дуллай ур.
МахIаммад Оьмаровлул бувсмунийн бувну, РКНК-рал агьаммур даву хъанай дур Ккавкказуллал циняв миллатирттал культура ва аьдатругу дурурччуну, Аьрасатнавуцири агьалинащалсса арарду цIакь дуваву.