Кару дихьултрал чемпионат най дия Сулайман Стальскийл цIанийсса Лазгиял драмтеатрданул къатраву. Буниялагу кIукIлусса кIанттайгу щябивкIун, театрданул сахIналий бивхьусса кIива столданух кару дихьулт бястлий буккаврих буруглангу иштахIну бия. Ва чемпионатрай гьуртту хъанай бия чIявусса Аьрасатнал ва дунияллул чемпионтал хьусса спортсментал. Ттун цакьнивагу бавссия кару дихьултраву Дагъусттаннал чемпион хьун захIматшиврия Аьрасатнал ягу Дунияллул чемпион хьуннияр. Циван учирча, хъинну чIявусса бястлий буккан ччисса кару дихьулт бикIайну тIий жучIава Дагъусттаннай.
Январь зурул 7-8-ний Дарбантлив хьунни 19-мур Дагъусттаннал кару дихьултрал (армспортрал) чемпионат.
Нава хIайп учинссарив ва чемпионатрай ци иш бия учирча, царагу жулла районнаясса кару дихьулт бакъая ва чемпионатрай гьуртту хъанай. Буссархха жулагу дунияллул кару дихьултраву чемпионтал хьусса, эбрат ласун бучIисса чиваркI. Ттун кIулссаксса Чупалав Оьмаров Дунияллул чемпионнихха. Цувагу цIанасса Ккуллал райондалул халкьуннал Дагъусттаннал депутатътурал кьюкьлувун увчIусса.
Чемпионатрай гьуртту хъанай бия душругу. Вай бястлий буклай бия 55, 65, 80 килордал кIушиврул категориялуву. Арамтал гьуртту хъанай бия: 55, 60, 65, 70, 75. 90, 100, 110 килордал категориялуву. Най бия мукунма шагьрурдал, районнал дянивсса бяст-ччаллугу. Вай бяст-ччаллаву цалчинмур кIану бувгьуна МахIачкъалаллал, кIилчинмур Дарбантуллал, шамилчинмур Хасаврал. Хъиривми кIанттурду бувгьуна Сулайман-Стальскаллал, Сергокъалаллал, Каспийскаллал.
Ка дишавриву чемпионтал хьусса лак:
дунияллул чемпионтал – Чупалав Оьмаров
ва ТIагьир ТIагьиров,
Европанал чемпион Залимхан Аьбдуллаев.
КIицI дуван ччива цинявнналсса къадарчагу цаппарасса тренертурал ва спотсментурал цIарду Аьрасатнавух дакъассагу дунияллийхра цIарду ларгсса.Чемпионатрал хъунама судьяну ия Дагъусттаннал ка дихьултрал командалул хъунама тренер «Заслуженный тренер РФ» тIисса цIанин лайкь шаврищал, 2002, 2003-ку шиннардий «Дунияллул тренертураву яла хьхьичIунма» тIисса цIанин лайкь хьусса ХIасан Аьлибеков, 14-ла дунияллул чемпион хьусса ТIагьир МахIаммадов, 9-ла дунияллул чемпион хьусса Аьбдул Эльдаров, Малик ТIагьирбеков дунияллул чемпион, 4-ла дунияллул чемпион хьусса Оьмар Нурадилов, 2-ла дунияллул чемпион хьусса ХIажимурад Оьмаров, Болгариянаву 2007-ку шинал чемпион хьусса ачIи ссурхIиричу, ачIи лаккучу, Ккулатусса Аьйшал арснал арс МахIаммад Рабаданов ва мукунма цаймийгу.
Утти кIицI дуванну Дагъусттаннал чемпионтал хьуминнал цIардугу: Душвараву: 55 кг.Агъаева З., 65 кг.ЯрмахIаммадова С., 80 кг. Рамазанова Д.. Арамтураву: 55 кг. Салахов К., 60 кг. ХIажиев Ш., 65 кг, Мах1аммадов Ш., 70 кг. ХIабибуллаев. Ва категориялуву Рабаданов МахIаммадлул кIилчинмур кIану бувгьуна.75 кг. Исакьов, 85 кг. АьбдулхIалимов, 90 кг. Рамазанов, 100кг. Анкутаев,110 кг. Оьмаров Г..
Соревнованияртту тIитIлатIавривух гьуртту хьун бувкIун бия Дагъусттаннал кару дихьултрал (армспортрал) федерациялул хъунама ХIажиев Арсен, Дарбант шагьрулул физкультуралул ва спортрал комитетрал каялувчи Рзаев Навои, Лазгиял драмтеатерданул директор Мусаев Аьлибаг ва Дагъусттаннал спортрал министерствалул чулухасса вакилтал: Рабаданов Батыр (ва мукуна чемпионатрал хъунама секретарьнугу ия), Горлова Ольга.
Чемпионат ларгунни цилла багьайсса кьяйдалий цукунчIавсса бувчIу-къабувчIавуртту къархьуну.
