Январьданул 21-нний ДР-лул ХIукуматрал Председатель МахIаммад Аьбдуллаевлул каялувшиврулу хьунни оператив масъалартту ххалбигьлагьисса совещание. Совещаниялий гьуртту хьунни ДР-лул ХIукуматрал Председательнал 1-ми хъиривчутал Низами Казиев ва Олег Липатов, республикалул министерстварттал ва ведомстварттал каялувчитал.
Ххалбивгьунни «Дагъусттан Республикалий коррупциялийн къаршисса законну ишакаш дуллалаврил хIакъираву» ва «Республикалул агьалинан транспортрал аьркиншивуртту бартдигьаврил тагьарданул ва пассажиртурал мюхчаншиву цIакь даврил хIакъираву» тIисса масъалартту.
Миннул хIакъираву ихтилат бунни ДР-лул юстициялул министр Азади РахIимовлул ва ДР-лул Транспортрал комитетрал председательнал цалчинма хъиривчу МахIаммадхIажи Ражабовлул.
ДР-лул банкирдал цIанасса тагьарданул анализ дан сакин бувсса комиссиялул хIакъираву ихтилат бунни ДР-лул ХIукуматрал Председательнал 1-ма хъиривчу Олег Липатовлул.
ДР-лул маэшат ххуй баврил ккаккиярттая бувсунни Дагъусттаннал статистикалул къуллугърал каялувчи Сергей Ильяшенкол.
ДР-лий «Сочи-2014» олимпий цIарал эстафета даврил хIакъираву ихтилат бунни ДР-лул спортрал министрнал 1-ма хъиривчу Зайнал Салауттиновлул.
Совещаниялул хIасиллу дурну махъ ДР-лул ХIукуматрал Председатель МахIаммад Аьбдуллаевлул хасъсса министерстварттан ва ведомстварттан тапшур бавуртту дунни.
