Декабрьданул 10-нний МахIачкъалалив «Президент-комплекс» ГУ-раву дия хъуннасса уттарашин. ХьхьичIва «Илчи» кказитрай ва республикалул махъсса СМИ-рдай баян бувну бивкIсса куццуй, ва кьини Каспийскаллал листовой пюрундалул заводрал «День карьеры» цIанилусса хъуннасса мероприятиялул дайдихьу хьунни. Гихуннайгу, ва цIуну буллалисса заводран аьркинсса пишакартал бавтIун щаллу хьуннин, цаппарарилла хьунтIиссар укуннасса Кьинирду.

Бадрижамал Аьлиева
Ва кьини «Президенткомплекс» ГУ-равун бавтIун бия, хъунмурчIин, МахIачкъала, Каспийск шагьрурдаясса, завод цуппа буллалисса Къумторкъалаллал райондалиясса, мукунма, республикалул цайми шагьрурдаясса ва районнаясса жагьилтал. БавтIцири инсантурах бурувгун, цал ххишалагу, тасттикь хъанай бия зузи кIанттул масъала жулла республикалий ца цIурувкьюмур бушиву, цивппа цIанасса чIумал зузими давурттая рязи бакъасса инсанталгу къачансса бушиву чIалай бия. Зал бувцIуну, цикссагу инсантураща буххан къавхьуну, гихунмай залдануву хъанахъимур видео-мониторданувух ккаккан буллай бия кьатIув ливчIминнан.Мукун, ва батIаву ларгунни кIива майдандалий: залдануву ва кьатIув.
Б атIаву дайдихьлай, «Кас-
пийский завод листового стекла» ОАО-рал Директортурал советрал член, ва заводрал исполнительный директор Абакар Мудуновлул барчаллагь увкунни ва кьини залданувун бувкIминнахь, кутIану бувсунни заводрал уттининсса хъунбакъасса тарихрая, му заводрал республикалун ва аьмну щалвавагу Ухссавнил Ккавкказуллан цуксса агьамшиву дуссарив.
— ХIакьину завод ххуллийн буклакисса кьини жу ххарину буру жулва чIарав зугу буну тIий. Ттул кIира шинни ва проектрай каялувшиву дуллай, кIирагу шинал дянив цикссагу давурттив дурссар. Жун ччай бур гьарцагу дагъусттанлув вих хьуну цалла карьера цащара дуван бюхъайшиврийн. Гьарцагу зуруй дувавантIиссар укуннасса хьунабакьавуртту, миннуйгу язи бугьлантIиссару хьхьичIунми зузалт, хIакьсса патриотътал. Жун хъинну ччай бур заводрай дагъусттанлувтал зий. Му, хьхьичIва-хьхьичI, Дагъусттан Республикалул Президентнал ва ХIукуматрал позицияр. Жу зун дуллай буру социал лифт, зуща бюхъаншиврул муний лавай лахъан, — увкунни Абакар Сайпуллаевичлул.
Г ихунмай махъ лавхъунни «Каспийский завод листового стекла» ОАО-рал директор Владимир Самониннул:
— Ва проектрал лагма лаган бунни за кIулсса, хьхьичIунсса цикссагу пишакартал. Му даву цIанасса чIумалгу найнна дур. ДуркIун дур чIун производствалул команда датIинсса, цилгу заводрал оьрму щирикIин бувансса, завод буллай, муниву бивхьусса чIяву миллионнансса инвестициярду мюнпат буну зузи буллай, грамотнайсса, хьхьичIунсса давурттив дуллансса. ХIакьину зал щапI куну буцIаврил ттул дакI ххари дуллай, гьавас бутлай бур. ХIакьину зучIа чIяруминначIа дур ххаллилсса хIалу ва проектрал давривун хIала бувххун, Дагъусттаннал ялун бучIантIимур щаллу буллансса. На гьакссагу ххарину икIанна зул дянивасса чIявуми жулла предприятиялий ххалхьурча, жул командалул члентал хьунсса хIарачат бувну, хъит-шит увкуну. Му хьунтIиссар цалла карьера дуван ччисса инсантурансса тIайлабацIуну, хIалуну. ЧIумувун, жува пахру буллантIиссару укунсса предприятиялий зузаврия, — увкунни Владимир Николаевичлул.

• Ва проект хъанай дур республикалий щаллу дуллалисса цалчинсса хъуннасса инвестицион проект. Ванил хъирив щаллу дуллантIиссару цимирагу цаймигу инвестицион проектру, цинярдагу 16 проект

Даврийн кьамул баврил шартIирдащал бавтIми кIул бунни му масъалалулсса бан Дагъусттаннайн увкIсса, зузалт лякъаврил ва язи бугьаврил Центрданул «Консалтинговая группа «Кворум» ЗАО-лул каялувчи Денис Вериннул:
— Заводрал персонал бавтIун щаллу хьун аьркинссар 2013 шинал май зуруй. Мува чIумал предприятиялий зунсса зузалт дуккин буллайгу байбишинтIиссар, хьхьичIунсса вузирдал ва заводрансса оборудованиялулсса буллалисса дунияллул поставщиктурал кумаграйну сакин дурсса хасъсса программалийн бувну…
Гихуннай бавтIминнан пюрун буккан буллалисса уттизаманнул предприятиялул даврия ларсъсса видеоролик ккаккан дунни. Муния махъ, Денис Вериннул гьарта-гьарзану бувсунни заводрай ци къуллугъру, ци подразделениярду бикIантIиссарив, ци журалул ва циксса зузалт аьркинссарив, цалва ихтилатраву чIурчIав дунни гьарцагу къуллугърал, гьарцагу подразделениялул, вузрал выпускникнахьхьун бикIу, зий шинну дурну, даврил опыт буминнахьхьун бикIу, гьарцагу зузалахьхьун хIалу дулунтIишиврий хьхьичIунмай бачинсса.
— Вай махъсса мукьрагу нюжмардий жу хьунабавкьуру республикалул хьхьичIунсса вузирдал – ДГТУ-рал, ДАГГАУ-рал, ДГИНХ-лул, выпускниктуращал. Биялсса бусарду заводрая, инвестициярдая. Ва дахьра дайдихьур. Заводрал даву дайдирхьуну махъ, зузи дантIиссар жагьилсса пишакартурансса программа. Мунивунна духлахиссар вузирдал выпускниктал предприятиялийн стажировкалий букIлансса хIалугу. Харжирая тIурчаннив, му линейный производственный персоналданул бикIантIиссар дянивну 25 азарда къурушрайн бивсса, специалистурал ва инженерно-технический составрал бикIантIиссар 50 азаруннийн бивсса. Ялун нанисса шинал апрель зуруй цалчинми пишакартал дуккин тIайла буккантIиссар. Ттухьхьун чIявуну буллан бикIай суал «зу заводрай зунсса зузалт цIанава циван батIлай буру» тIисса. Мунинсса багьанагу, цалчин – дурккуну къуртал хьуннин чIун гьан най дур, заводрал даву дайдишиннин цал зун хIадурсса зузалт аьркинну бур, кIилчингу – зузалт язи бугьаву му ца кьини, кIира кьини дурну къуртал шайсса даву дакъар, мунингу аьркинни диялсса чIун…
Ва кьини залданувагу буллунни цикссагу суаллу, даврил шартIирдайн, соцпакетрайн, даврийн биян буллансса ва буцлансса транспортрайн, заводрал аьрщарай бантIисса медпунктрайн, мизитрайн ва цаймигу масъаларттайн багьайсса. Миннухьхьунгу заводрал каялувшиннарал дуллунни балжисса жавабру. Масалдаран, заводрал аьрщарай мизит бантIиссарив, заводрайн повартал аьркин хъанантIиссарив тIисса. Цалчинмур суалданухьхьун жаваб дуллай, Абакар Сайпуллаевичлул чIурчIав дунни цувагу куртIну Аллагьнайн вихсса инсан ушиврий, му масъала цаннагу хъинну агьамшиву дусса масъала бушиврий, ва заводрал аьрщарайгу чара бакъа мизит бувантIишиврий. Гихунмай ванал бавтIминнахь увкунни:
— Ва проект хъанай дур республикалий щаллу дуллалисса цалчинсса хъуннасса инвестицион проект. Ванил хъирив щаллу дуллантIиссару цимирагу цаймигу инвестицион проектру, цинярдагу 16 проект (масалдаран, горнообогатительный комбинат, керамикалул плитка дувайсса завод) . Зун ччисса гьарцагу дагъусттанлувнаща хьунтIиссар зун, цалва кIану бугьан. Мунияту, ца ва заводрай бацIаву дуллан къааьркинссар. Завод бувну къуртал хьуну махъгу, мунил лагма-ялтту цикссагу къуллугъру зунтIиссар, медпунктрая, пожарная частьрая тIайла хьуну, заводрал аьрщарай бантIиссар чIяву квартирарду бусса къатта, гостиница…
Ахирданий, ва кьини залданувун бувкIсса, даву аьркинсса гьарцаманал буцIин бунни резюме.
Ва кьини анкетарду дуцIин дан къавхьуминнаща бюхъайссар зузи кьинирдай кIюрххил ссят 10-нния ахттакьуннай ссят 6 хьуннин Буйнакскийл цIанийсса кIичIираву №12 «а» къатраву бивхьусса офисравун биян. Вания тиннайгу чIун-чIумуй хъанантIиссар укуннасса хьунабакьавуртту.