Нюжмар дакIний лирчIунни

Ссайну дакIний лирчIри вин ларгсса нюжмар? Укунсса суал булару жу кказитрал гьарцагу номерданий.

Загьидат Аьзиева, Дагъусттаннал халкьуннал хозяйствалул институтрал преподаватель:
— Ттун дакIний бакъар МахIачкъалалив укун хъунмасса марххала бувсса чIун, хъиншиврун, хъинбалдарансса хьуннав. Резиндарал усру дакъаманай цIими хъанай бия, марххалттанивунгу кьутIлай бачин багьлай бия. Лаккуй интту байсса кунмасса ччаппа марххала бия, ва 2012-кусса шин тIайла дуккан, цIумур хьунадакьин шагьрулул кIичIиртту шюшлашисса. Мукунххай бикIанну, цIушинал байран хьунадакьин тIабиаьтра хIадур хьусса ххай бикIанну.
КьюлтI къабанна, гужну нигьа буслай бивкIра ахирзаман бизантIиссар тIисса 21-мур декабрьданул кьини дучIавриягу. Шаппа къабавцIура му кьини, гьантта бикIан уссийчIан лавгра. На Майяхъал хавардая нигьа бувсун къабивкIрача, планетардал парадрая нигьа бувсун бивкIра. Ккавкказнаву аьрщи сукку хьун бюхъайссар тIий бия. Душгу дарсирдайн гьан къабивтссия, ттула чIарав бикIанссар тIий. Му кьини шанул ккик къаучав, хъирив кьини ххаришиврул нацIу-кьацIу дачIав чIаххурайх. Цуппа аьлимтурал тIутIимур тIайлабавцIуннихха. Декабрьданул 22-нний ТВЦ-каналданий баян бувна, ттигу 23-мур ва 24-мур кьинирдая нигь душиву, Ккавкказнаву лухччи сукку хьун бюхъайшиву. Декабрьданул 23-нний баян бунни Сочилий, Абхазиянаву лухччи сукку хьушиву (5-7 балл). ЦIусса шин жулва миллатрацIун даркьусса, ххуйсса хьуннав. БачIвасса тIардая ххуйсса хаварду хьуннав.

Аьбдулжалил Мусаев, ишбажаранчи:
— Аьрасатнал Президент Владимир Путиннул ва Дагъусттаннал Президент М. МахIаммадовлул телевидениялийсса пресс-конференциярдайну дакIний лирчIунни. КIинналлагу ларгсса нюжмардий дунни пресс-конференциярду, журналистурал, агьалинал суаллахьхьун жавабру дуллунни. Нагу буллуссия жулама президентнахьхьун Дагъусттаннайсса коррупциялущал мяйжаннугусса талатаву та дуллантIиссару тIисса суал, амма му суал студиялувун къабивунни, къакIулли ци багьана хьуссарив. Цалчинни Дагъусттанналма президент прямой эфирданий агьалинал суаллахьхьун жавабру дуллалисса, му ххуйсса даву хьунни. Хаснува цалва суаллу президентначIан бивми рязийну бухьунссар.
Аьрасатналма Президентнал журналистурал хьхьичIун прямой эфирданий уккаврил биялсса опыт бур, мунан кIулли агьали цала тIутIимуний мукIру бан, ххуймур хьуншиврий вихшала дишин бан. Ва базилухгу агьалинал дакIру ххари дансса ихтилат бия президентнал, харжру, пенсияртту гьаз бантIиссар, билаятрай экономика хьхьичIуннай хьунтIиссар, халкьуннал маэшат гьаз хьунтIиссар тIий ия.
Лавгра №22 садикрайсса ттула чIиви арснал ЦIусса шинал байрандалийнгу. ЦIусса шинал байран бусурманнал байран дакъар тIутIими бурган аьркинни мюрщисса оьрчIру му байрандалия цуксса хIаз, неъмат ласлай буссарив. Дингу цурда диртун, оьрчIан байран дитан аьркинни. Хъунама арс авчунни ттухьгу, шаппа елка къабишинтIиссар, ва бусурманнал байран дакъар тIийча, ганахьгу учав: туну оьрус мазрай циван гъалгъа тIий ура, оьрус маз – бусурманнал мазрив? Жува оьрмулуву исламрал тIийкун къуццу тIий, шариаьтрал кьануннай яхъанай за бурув? Игрушка бучIисса, матрешка бучIисса, елка циванни къабучIисса? На диндакъу ххай мабикIару, диндалул хIурмат ттучIа хъунмассар, амма хIакьину ЦIушинал байран – бусурманнал байран дакъашиву исват буллай къяна бугьаву – му ссанчIавгу къааьркинсса тарапри. Шин къуртал хъанай дур, жува ужагърай матахIра цIудуккан дуллай, хьумунил, лавгмунил хIисав дуллай, шинал хIасиллу дуллай бикIару. Бахшишру дуллай оьрчIру ххари буллан бикIару, ахир.
Барачатсса хьуннав ва ялун нанисса ЦIусса шин! Ххари уваннав гьарма. ЦIуллушиву — гьарманахьхьун, цIуцIавуртту – архиврдавун.

ЦIухху-бусу бувссар
ПатIимат Рамазановал

Добавить комментарий