Владимир Путиннул дурккунни АьФ-лул Президентнал Федерал Собраниялийнсса Рисала

Декабрьданул 12-нний ПаччахIлугърал бакIчи Владимир Путиннул дурккунни Аьрасатнал Федерациялул Президентнал Федерал Собраниялийнсса гьар шинахсса Рисала.

АьФ-лул Конституциялийн бувну, Аьрасатнал Президентнал дуккайссар Федерал Собраниялул члентурахь билаятрайсса тагьарданул хIакъиравусса ва виваллил ва кьатIаллил политикалул ялу агьамми ххуллурдал хIакъиравусса Рисала. Президентнал Рисала хъанахъиссар яла гъансса чIумуву ва ялун дучIансса чIумал властирдал дан аьркинсса давурттал программа. 

Кремлилул Хъунмур дворецравусса Георгийл залдануву хьусса церемониялий гьуртту хьунни Федерациялул Советрал члентал, ПаччахIлугърал Думалул депутатътал, ХIукуматрал члентал, Конституциялул, Верховный Арбитражрал судирттал каялувчитал, губернатортал, регионнал законну дуккан дайсса собраниярттал председательтал, конфессиярттал бакIчитал, жяматийсса ишккаккулт, СМИ-рдал каялувчитал.
Дагъусттан Республикалул чулухату церемониялий гьуртту хьунни Дагъусттаннал Президент МахIаммадссалам МахIаммадов ва ДР-лул Халкьуннал Мажлисрал Председатель МахIаммад-Султан МахIаммадов.
Тиккун бавтIминнахь Владимир Путиннул бувсунни билаятрал политикийсса система хьхьичIуннай дачин дансса цаппара цалла дан дакIнийсса давурттая. Миннуяр ххишалагу, паччахIлугърал бакIчинал бувсунни виваллил ва кьатIаллил политикалул яла агьамми ххуллурдал хIакъиравусса, экономикалул ва социал сфералул модернизациялул, обороналул ва мюхчаншиврул масъаларттан хасну цалла дан-дитанмуния.
Му куццуй, Президентнал бувчIавурттая махъсса цалла цалчинмур Рисала Федерал Собраниялул хьхьичIун ласлай, Владимир Путиннул гьартану бувсунни билаят хьхьичIунмай бачин баврил цаппара агьамсса масъаларттая.
Хаснува Рисалалуву хъуннасса къулагъас дурну дур Аьрасатнал миллатирттал дянив цашиву дуруччаврил масъаларттах. «21-мур ттуршукулул дунияллий экономикалулгу, цивилизациялулгу, аьралунналгу гужру цIусса низамрайн бувцусса тагьардануву Аьрасат бикIан аьркинссар тархъансса, цилва билаялийсса ва махъ нанисса билаятну. Жува аьркинссару сивсуну хьхьичIунмай нанаврияр ххишала, дуруччин жулва миллатирттал ва рувхIанийшиврул ляличIишиву, нация хIисаврай жува чан хьун къабикIан. Аьрасатнува бугу буну, Аьрасатнува лигу личIан», — увкунни ПаччахIлугърал бакIчинал.
«Жува хьунабакьлай буру хIакьину, декабрьданул 12-нний, Конституциялул Кьини. Ччай бур жулва билаятрал агьаммур закондалуву ккаккан бувсса ххазинардал мяънардая бусан. Конституциялуву цIанасса ва ялун нанисса никирттал хьхьичIсса Ватандалухлусса агьалинал жаваблувшиву баян бувну бур Аьрасатнал паччахIлугъшиврул гьанумур принципну. Гьамин гражданшиврул жаваблувшивруву ва патриотшивруву чIалай бур жулла политикалул агьали цачIун буллалисса гьану.
Патриотшиврул мяъна хъанахъиссар так жулва тарих хIурматрай бикIаврияр ххишала обществалул къуллугъ бавугу.
Жунма аьркинссар ябан жунма жулва буттахъая ливчIсса ляличIисса опыт. Аьрасат ттуршукурдай хьхьичIунмай най бивкIссар чIявумиллатру бусса паччахIлугъ хIисаврай, паччахIлугъ-цивилизация хIисаврай, цурдагу оьруснал халкьуннал, оьруснал мазрал ва культуралул цIакь дурсса, жува циняв цачIун буллалисса ва бявххуну гьан къабитлатисса.
Ва дунияллий жува, личIи-личIисса миллатирттал бухьурчагу, бивкIссару ва уттигу личIлачIиссару цасса халкьну.
ДакIний дур ца ветерантуращалсса хьунабакьаву. Тикку бия личIи-личIисса миллатирттал инсантал. Гайннавасса ца ветераннал, къаоьрус инсаннал увкуна: «Щалла дунияллун жува ца миллатру, жува оьрусру». Мукун бивкIссар дяъвилул чIумалгу, кIукун бивкIссар мудангу.
Жува хъунмасса хIурматрай бикIару, мукун бикIангу аьркинссар. Жулва миллатру чIявушивруву дуссар жулла ххуйшивугу, жулва гужгу.
Амма жунма дакIний бикIан аьркинссар ччимур миллатпарасшиврия ва шовинистчишиврия хъунмасса зарал биллалишиву миллат парастурал чул бугьлагьисса миллатран. Мунияту Аьрасатнан хъуннасса нигьачIаву дуссар личIи-личIисса миллат парастуралли ва экстремистчитуралли тIисса хIукмурдая». Тайннал ци хъуни махъру лахъларчагу, тайннал жулва жямат лиян бансса, пасатшиврул иширттайн кIункIу буллалиссару. Миллатирттал диннал дянив ссивцIу бичин кьаст дуллалаврих жува бурган аьркинссарe Аьрасатнал паччахIлугърайн вызов даврих кунма, жула гьарца инсаннайн диллалисса нигьачIаврих кунма. Жува къабитанну Аьрасатнаву хIасул хьун лавкьусса миллатирттал анклавру, цалва къаформальнайсса юрисдикциялущалсса ва билаятрал правалул ва культуралул дазурдавух бакъасса.
На тапшур буллай ура Аьрасатнал Федерациялувусса республикарттал бакIчитурайн, губернатортурайн, хъунисса шагьрурдал мэртурайн. Ва цинявннаяр хьхьичI зуйн багьайсса масъалар. Даву дачин дуван аьркинссар инсантуращал, гьарца кьини му даву мюнпатсса хьуншиврул. Аьрасатнал цашиврийн, щаллушиврийн ва тархъаншиврийн махъ бакъассар. Ччими сепаратшиврул ва миллатпарасшиврул ишру аьркинссар букьан бан политикалул давурттава», — увкунни цалва ихтилатраву Владимир Путиннул.
ДР-лул Президентнал прессалул къуллугъ