ДукIу гъинттул буллай байбивхьуну буссия ччянияцIава чIа тIий бивкIсса Вихьуллал школа. Амма гьанурдугу бувну, цIунилгу дацIан дуруна давурттив. Ганин багьанагу, жунма цинявннан кIулсса куццуй, арцу дакъашиву бур. Вана уттигъанну, Вихьуллал шяравун лавгун унува, ттул янилун дагьуна яруннагу ххуй дирзсса, дакIгу ххари дуллалисса сурат. Му суратрайгу дия кIяласса селикатрал калпуширттая дурсса мадара гьанулияту гьазсса кIирайра къатри. Мунияту на гай давурттаяту цIухху- рухху буван хьунаавкьуссияв ва школа буллалисса ООО «Альфастрой» идаралул шиккусса давурттай каялувшиву дуллалисса прораб ХIамзалов Камил МахIаммадлул арснащал. Ванал ва ттул дянив хьуна укунсса ихтилат.
— Камил МахIаммадович, бувсун ччива Вихьуллал шяраваллил янилусса, яла дакIру ххари дуллалисса, инара каялувшиву дуллалисса давурттаяту?
— Барчаллагь, ихтилатрал бакIрайва шяраваллил жямат ххарину бушавриятусса пикри ттущалва кIибавчIуну тIий. Ва Вихьуллал шяравусса, 220 дуклаки оьрчIансса, школа буллай байбивхьуссар дукIу гъинттул. Гания шиннай шикку дурну дия, строительтурал зумуну учин, «нулевой цикл», яни гьанурду бувну къуртал бувну бия. Яла ва шинал дайдихьулий хъиривми давурттив къадуллан багьана шавугу арцу итакъадакьаву хьуссар. Вана утти сентябрьдания шинмай зий буру.Вай давурттивгу дуллалиссар ООО «Альфастрой» тIисса идаралул. Ванил хъунаманугу ур Ккуллал шяравасса Оьмаров Оьмар Аьлил арс. Ва чIярусса шиннардий строительствардал кушурдай зий ивкIсса пишакар ур. Жу шиккун бучIаннин зий буссияв Каспийскалий «Хазар» тIисса стадион буллай. ЦIанакул жу шикку буллай байбивхьуру дуккаврил корпусрал ва спортзалданул чIиртту. Уттинин дузал буварду учебный корпусрал цалчинмур зивулул чIиртту. Байбивхьуру магъи дихьлай. Зиву дикIантIиссар кIира. Дунияллул мажал битарча, дакIний буру шинал ахирданийннин ва зиву, чIавахьулттивгу бивхьуну, къуртал дуван. Мукунма, буллай буру спортзалданул чIирттугу. Ванил лахъшиву дикIантIиссар ряхра метралул. ХIакьинунин дуварду шанна метралуяр лахъсса.
— Ци механизмарду дур зучIа зий?
— ЖучIа бур бетон бувайсса хъун бакъасса завод. Бур мукунма бетон ххилан бикIайсса, строительтурал зумуну учайсса, «миксер» машина. Бур «Локо» тIисса Финляндиянал, 25 тонналийн дирсса гьиву 34 метралул лахъшиврий гьаз дуван бюхъайсса, автокран, кIива экскаватор. Къун, щама, калпушру ва цайми шикку аьркинсса затру МахIачкъалалия ххилаххисса машинарттугу буссар.
— Цими зузала ур шикку зий?
— Гьарца кьини шикку зий икIайссар 18 зузала. Вай зузалт цивппагу, муку-тукунсса «шабашниктал» бакъарча, бунияласса пишакартал бур. ТIайлар, жучIа, ца къаралчи личIаннин, цама цучIав Вихьлиятусса акъар.
— Бувсун ччива ва школалул заказчик цу уссаривгу?
— Жу буллалисса школалул заказчик хъанахъиссар ГУП Дирекция ФЦП «ЮГ России по РД». Школалул проект дурну дур «Дагагропроект» институтрал. Шиккува ххи буван, вай давурттал финансированиялул чулухагу цалсса цукунчIавсса дайшишру дакъар.
— Зул дуки-хIачIиялул иш цукун бур?
— Жун дуки-хIачIия дуллай бур шиккувасса интернатрай АхIмадова СалихIат тIисса хъамитайпа. Мукунма кIицI буван ччива, дукра жун жула идаралул цилла счетрай дулайшиву, зузалтраяту цичIав дацIан къадурну.
— Буси шикку зузисса зузалтрал цIардугу?
— 12 шинал стаж бусса, Буттаев Оьмар тIисса крановщик ур Хъусращиял шяравасса. КIива чарил усттартурал бригада бур. Миннал бригадирталнугу бур Аьбдуллаев Мурат ва ХIитIинов Кьурбан, сварщикну зий ур Оьмаров Шамил.
Бувсуна ттухь Камиллул, мукунма, цивппа зий бушиву кьинилул лахъишиврий бигьа лагай кьинирдугу къакIулну. Циван учирча, нажагь цакуну дяркъу хьурча, цанна давурттив дацIан дуван багьан тIий бушиврийн бувну.
На Камиллущал ихтилатрай унува стройкалийн увкIуна Вихьуллал шяраваллил администрациялул хъунама ХIусайнов МахIаммад Ххачилавл арсгу. Ваналгу цала ва жяматрал чулуха барчаллагь тIий ушиву бувсуна укунсса анаварсса бущилий давурттив дуллалисса строительтурахь. МахIаммад Ххачилаевичлул дахьра-дахьра сий дагьлан диркIунни тIива Вихьуллал шяраваллил. Ттуккул БухIай ххуйва-ххуйсса чIалъаьрду, ялавайну ссавнищал бястлийсса магъулусса спортзал, Кьуллалух урувгнал дакI ххари дуллалисса кIяласса чIирттащалсса школа. Ванийну хъанахъиссар тIива шяравалу диркIлай дакъача, ялагума вирин дизлай душивугу. Шикку дуллалимуницIун Аллагьналгу кабакьинхьуви. Амин.
ХIажимурад ХIусайнов
